Хорин наймадахи сэсэрлиг

Хэды тиигэбэшье хүүгэдэй 5-тай болоһон хойнонь арай гэжэ ээлжээниинь ерэжэ, сэсэрлигтэ ородог. Энэ бэрхэшээл шиидхэхэ зорилготойгоор Буряад Уластамнай жэл бүри шэнэ-шэнэ сэсэрлигүүд баригдана.

-Хяагта хотодо хүүгэдэй шэнэ сэсэрлиг барижа, ашаглалгада тушааба гээшэбди. 2017 онһоо эхилжэ баригдаһан 28-дахи сэсэрлигэй байшан болоно. Энэмнай Ород Уласай Юрэнхылэгшэ Владимир Путинай даалгабаряар бэелүүлэгдэһэн түсэл. Алас Дурна зүгэй тойрогто бэелүүлэгдэдэг түсэлэй аргаар байшан барихаһаа гадна, зосоохи хэрэгтэй эд бараа худалдан абажа шадаабди, - гэжэ Буряад Уласай Толгойлогшо Алексей Цыденов хэлэбэ.

Гэхэтэй хамта Наушкида үшөө нэгэ хүүгэдэй сэсэрлигэй, Хяагта хотодо хүүгэдэй поликлиникын байшан баригдана. Үндыжэ байһан үри хүүгэдэйнгээ һайн оршон байдалда ургахынь түлөө ажал хэгдэжэ байна.