"ЗАНШАЛ ТОГТООҺОНДОО БАЯРТАЙБДИ"

Ерээдүйдэ буряад хэлэн ба уран зохёолой, мүн эвенк хэлэ бэшэгэй мэргэжэлтэд болохо оюутад энэ хэмжээ ябуулгада дуратайгаар хабаадаба. 1-дэхиһээ 5-дахи болотор - бүхы шатын оюутад сэбэр агаарта гаража, бэе бэетэеэ танилсаха, хүхюу зугаатайгаар сагаа үнгэргэхэ зорилготой байгаа.

Манай бүлгэмэй оюутад энэ хэмжээ ябуулга эмхидхээбди. Старостамнай - Ли Мунхэ-Зула. Тиигэжэ нэн түрүүн «Огонёк» гэжэ лагерь хүлһэлхэ, БГУ-гайнгаа захиргаанда бэшэг бэшэжэ, 25 һууритай хоёр автобус гуйжа абаха ябуулга хээбди гэжэ тэмдэглэлтэй.

Хэмжээ ябуулгын эхиндэ бүлгэм бүхэн зохёохы презентаци харуулаа. Оюутад үреэл, дуу, хатар, шүлэг гүйсэдхэжэ, гоё концерт наада табяа. Хаража байхада, оюутадшье, багшанаршье ехэл баяртай байгаа. Саашадаа Буряад хэлэнэй болон уран зохёолой дээдын һургуулиин захирал Гарма-Ханда Цыбикжаповна Гунжитовада үгэ үгтөө. Тэрэ амаршалгын дулаахан үгэнүүдые хэлэһэнэй һүүлээр һуралсалдаа эрхим бэрхэ ба олониитын ажал ябуулгада эдэбхитэй оюутадые үргэмжэлэлөөр шагнаа.

Хэмжээ ябуулгын хоёрдохи хубида оюутад хүхюутэй квест үнгэргөө. Эндэ бүхы шатын оюутад наадажа, бэе бэетэеэ дүтөөр танилсаба, нүхэд ёһоной харилсаа тогтообо. Шабинарайнгаа наадажа байхадань, багшанарнай амтатай эдеэ хоол бэлдээ. 

- Оюутад ба багшанарнай ехэнхидээ hуралсалай танхимдал уулзадаг гээшэ ааб даа. Тиимэhээ иигэжэ сэбэр агаарта гаража, сэнгэжэ, бэе бэетэеэ харилсахада, ехэ зохид байгаа. Манай дээдын hургуули Зүүн зүгэй һалбариин бүридэлдэ ородог юм. Тиимэhээ хүмүүжүүлгын талаар ехэнхи хэмжээ ябуулганууд бүхы hалбариин хэмжээндэ үнгэрдэг. Эгээ аха 5-дахи шатымнай оюутад үүсхэл гаргажа, Буряад хэлэнэй болон уран зохёолой дээдын hургуулиин иимэ үдэр түрүүшынхиеэ үнгэргэбэбди. Энэ хэмжээ ябуулгада хабаадахадаа, манай оюутад хоорондоо бүри дүтэ, эбтэй болоно, 1-дэхи шатымнай үхибүүд дээгүүр hурадаг оюутадтаяа танилсана, гадна ерээдүйн багшанар мэргэжэлэй талаар тусхай шадабаритай болоно, - гэжэ Буряад хэлэнэй болон уран зохёолой дээдын һургуулиин захирал Гарма-Ханда Гунжитова тэмдэглэнэ.

Иимэ уулзалга манай Буряад хэлэнэй болон уран зохёолой дээдын hургуулиин оюутадта тон сэнтэй гэжэ һанагдана. Бидэ, 5-дахи шатын оюутад, иимэ уулзалгануудые эмхидхэхэ заншал бии болгоһондоо ехэ баяртай байнабди.

Баримта

Д.Банзаровай нэрэмжэтэ Буряадай гүрэнэй ехэ һургуулида буряад хэлэ бэшэгэй мэргэжэлтэдые бэлдэлгэ 1932 онһоо хойшо таһалгаряагүй ябуулагдаһаар. Мүнөө энэ ажал ябуулга Зүүн зүгэй институдай бүридэлдэ ородог Буряад хэлэнэй болон уран зохёолой дээдын һургуулиин дэргэдэ эрхилэгдэдэг юм. Тэндэ мүнөөдэрэй байдалаар 156 оюутан һурана.