Һанан дурсаа

Соборно үйлсэдэ оршодог хүшөөгэй дэргэдэ хотын ажаһуугшад олоороо сугларжа, баглаа сэсэгүүдые табяа, хардалгада дайруулһан зоной нэрэнүүдые һанан дурсаа.  Шажанай түлөөлэгшэд маани мэгзэм заншалта ёһоороо уншаа.

Холын һүрөөтэ жэлнүүдтэ Буряадай дэбисхэр дээрэ үнэн алдартанай 211 һүмэ, 44 дасан, мүргэлэй хуушан заншал баримталагша шэмээшэгүүдэй 81 мааниин гэр, еврейнүүдэй - 7, мусульман һүзэгтэнэй - 6, баптистнуудай бүлгэмэй - 5, католигуудай 1 һүмэ үгы хэгдэһэн байна.

 

- Дурасхаалай үдэр, октябриин 30-да, хүшөөгэй дэргэдэ хардалга хашалганда ороһон зоной түрэлхид олоороо суглардаг. Мүнөөдэр эндэ олон залуушуул ябана. Тэдэ хохидоһон зоной үхибүүдтэй уулзаа. Тэрэ аймшагтай үе саг тухай тон һайн мэдэхэ болонхой, юуб гэхэдэ, эдэ залуушуулнай  хардалга хамалганда ороһон зоной бүлгэмдэ тон эдэбхитэйгээр ажал ябуулдаг, - гэжэ уласай Засагай газарай түлөөлэгшэ Михаил Харитонов тэмдэглээ.

Энэл үдэр “Нэрэнүүдые бусаалга” («Возвращение имен») гэһэн акци үнгэрбэ. Доржи Банзаровай нэрэмжэтэ Буряадай гүрэнэй университедэй оюутад хардалгада дайруулһан эрхэтэдэй 900 гаран нэрэ дуулгахаһаа гадна, тэдэнэй богонихон намтар хөөрэжэ үгэбэ.

- 2015 онһоо хойшо сэдхүүлшэдэй эдэбхи үүсхэлээр “Дурасхаалай номдо” ороһон зоной нэрэнүүд тунхаглагдадаг болонхой. Бидэ энэ хэрэг дэмжэнэбди. Мүнөөдэр энэ номой 9  боти хэблүүлэгдээ, мүн электрон маягаар бүтээгдээ. Нэрэнүүдые согсолхо хэрэгтэ манай оюутад хабаададаг, эрдэмэй болон шэнжэлэлгын ажал эдэбхитэй ябуулдаг, - гэжэ дурасхаалай ном бэлдэлгын түсэлэй хүтэлбэрилэгшэ, БГУ-гай профессор Светлана Васильева хөөрэбэ.

Һануулан хэлэхэдэ, хардалгада ороһон зоной нэрэнүүдые сагааруулха тухай тогтоол Буряад Уласта 1991 ондо гараһан байна. Тиин 1994 оной апрель һарада хардуулагшадай үнэн нэрэ бусааха талаар бүлгэм байгуулагдаһан юм.