Үндэр хэмжээндэ үнгэргөө

Мүнөө жэл Хужарай һургуули заһабарилагдаа. Һуралсалай шэнэ жэлые үхибүүд һаруул, гоё таһалгануудта угтаа һэн. Һуралсалай гуламтын захирал Оксана Доржиевна Таряшинова   айлшадые заһабарилагдаһан һургуулидаа угтажа, баяртай байһанаа мэдүүлээ.

Тус һургуулида иимэ олон хүндэтэй айлшад үнинэйшье суглараагүй байгаа. Хужар нютагта эмхидхэгдэһэн Буряад хэлэнэй һайндэртэ хабаадахаяа Түнхэнэй аймагай бүхы һургуулинуудай үхибүүд,  багшанар суглараа.

“Буряад шүлэгөө уншая!” гэһэн уряа доро мүрысөөндэ үхибүүд  наһанай гурбан бүлэгтэ хубааран, урилдаанда оролсоо. Тэдэ ганса Түнхэнэйнгөө бэшэ, бүхы Буряад оронойнгоо мэдээжэ ирагуу найрагшадай бүтээлнүүдые уранаар уншаһан байна. Энэ шүлэгэй урилдаанда түрэлхидэй болон багшанарай хабаадаһаниинь һайшаалтай.

5-6-дахи классай шабинар диктант бэшэлгэндэ оролсоо. «Оюун ухаанай наадан» гэһэн һонирхолтой хэмжээ ябуулга һургуулиин тамирай танхим соо үнгэргэгдөө. Табан хүнһөө бүридэһэн команда бүхэн бэе бэетэеэ урилдаа. “Түрэл нютагни һайхан даа!” гэжэ дуунай мүрысөөн Хужар нютагай Соёлой байшанай дэргэдэ эмхидхэгдээ. Хэдэн жэлэй  саада тээ энэ соёлой гуламта гүрэнэй тэдхэмжын ашаар һэльбэн шэнэлэгдээ юм.

Хужарта болоһон Буряад хэлэнэй һайндэр үндэр хэмжээндэ эмхидхэгдээ гээд, Түнхэнэй аймагай багшанар, үхибүүд тэмдэглэнэ.