Хуушанһаа – шэные

- Олон жэлэй хугасаада Ород гүрэнһөө холо ажаһуугааб. Түрэһэн нютагаа бусажа, ганса үхибүүдтээ туһалаад һуухагүйб гэһэн зорилго урдаа табяаб. Бу­ряад Уласта, Ород гүрэндөө туһатай эрхэтэн болохо һанаатайгаар ажал ябуулхаяа оролдооб.

Һанаһан хэрэгээ ябуулжа эхилхэдэмни, одо мүшэд таараа. Джинсовэ хубсаһа хунар бог шорой дээрэ хаягдахадаа, байгаалида ехэ һаад ушаруулна гэжэ уншааб. Тэрэл үедэ Enplus бүлгэм байгаали хамгаалгын талаар тэдхэмжын мүнгэ хубаана гэжэ дуулааб. Энэ хэрэгээ һайнаар түсэблэжэ, мэдүүлгэ оруулаад, грантда хүртөөбди. Тиигэжэ хуушарһан джинсовэ хубсаһаар шэнэ зүйлнүүдые бүтээжэ эхилээбди.

- Һонирхолтой байна. Джинсовэ хубсаһан яагаад байгаалида һаад үзүүлдэг бэ?

- Хэдэн жэл соо Болга­рида ажаһуугааб. Байгаали хамгаалгада тэндэ ехэ ан­харал хандуулагдана. Бага дэбисхэртэй гүрэндэ элдэб бог шорой һанаһан газар­та хаяхагүйш. Харин манай Ород гүрэн дотор арад зон байгаалидаа тон муугаар хандана. Уһа голнууд, ой модон, тала гүбээнүүд, хада ууланууд хуу бог шоройгоор хушагданхай байна.

Хараад үзэхэдэ, элдэ­бын түхэлэй бог, илангаяа хубсаһа хунар хаягдана. Тэдээн сооһоо джинсовэ бүдөөр оёгдоһон зүйлнүүд байгаалида тон муу нүлөөтэй гээшэ.

Джинсовэ хубсаһан дэл­хэй дээрэ эгээл олоор най­маалагдана гэжэ хэлэмээр. Элдэб үнгэтэй болгогдохо­доо, хорото бодосуудтай будагаар хушагдана. Томо- томо фабриканууд энэ хэрэ­гые Азиин гү, али Африкын гүрэнүүдэй дэбисхэр дээрэ ябуулна. Энээнһээ боложо, тэндэхи уһа голнууд хүхэ, хүрин үнгэтэйгөөр урдана.

Хуушарһан джинсэеэ бог шорой дээрэ бидэнэй хаяха­да, саһанай хайлахада гү, али хура бороогой һүүлдэ тэрэ бодосууд бүхы үйлсөөр, тала дайдаар урдажа, байгаалиие бузарлана.

- Манай нютаг нуганууд­та үзэгдөөгүй хэрэгтнай хэр урагшатайгаар ябуулагда­наб?

- Энэ түсэлнай оройдоол хахад жэл соо бэелүүлэгдэнэ. Хэды тиигэбэшье, нэгэ хэды дүнгүүдые согсолхо һанаатайбди.

Апсайклингова мастер­ской нээжэ, ажалаа ябуулжа эхилээб. Хаягдаһан джин­совэ хубсаһа суглуулжа, гансаараа тэрээгээр шэнэ зүйлнүүдые оёхо гэһэн зо­рилго урдамни табигдаагүй - нүхэдөөрөө энэ хэрэгтэ олон хүнүүдые һургаха һанаатайбди.

403 килограмм шэгнүүр- тэй 504 джинсовэ хубсаһа суглуулха түсэбтэй байгааб­ди. Һүүлэй байдалаар 654 джинсовэ хубсаһа олообди. Манай ажалые мэдэһэн хүнүүд өөһэдөө хуушан юу­мэеэ асаржа үгэнэ. Энэнь һайшаалтай, бултанда бая­рые хүргэнэб.

Джинсые нарииханаар хайшалжа, гүрэжэ, элдэб юумэ хэнэбди. Табурет­кэ дээрэ табиха зөөлэн һуудалнуудые оёобди. Эдэниие авто-унаа соогоо- шье хэрэглэжэ боломоор. Багахан ковригуудые, ним­гэн хүнжэл, барюулнуудые болон бусад юумэнүүдые хээбди. Долоон хоногто хоёр дахин дуратайшуулые суг- луулжа, оюулжа, шэнэ юумэ хэжэ һурганабди. Иигэжэ һургалгын 39 хэшээл эм­хидхэжэ, дүй дүршэлөөрөө хубаалдаһан байнабди. 248 зүйл хэгдээ, 212-ыень бэ­лэглээбди. Хэшээлдэмнай ерэһэн хүн зон өөһэдын га­раар элдэб зүйлнүүдые хэжэ һураһандаа, баяртай гэртээ ошонод.

Enplus бүлгэм олон шэглэлээр ажалаа ябуулна. Грантнуудтань хүртэһэн бүхы түлөөлэгшэдөө тэдэмнай һаяхана Байкальск хотодо суглуулһан байна. Бидэ тэндэ дүй дүршэлөөрөө ху­баалдажа, үндэр сэгнэлтэдэ хүртөөбди.

Ноябриин 24-26-ай үдэрнүүдтэ Эрхүү хотодо “Байкалтур” гэһэн улас- хоорондын үзэсхэлэндэ хабаадаабди. Буряад Уласта залуу болон эхилжэ байһан өөһэдын хэрэг эрхилэгшэдтэ туһалдаг “Мой бизнес” эмхи маанадые тус харалганда хабаадахыемнай дурад­хаа. Ехэ үрэ дүнтэй хэмжээ ябуулгаһаа шэнэ зүйлнүүдые бүтээхэ гэһэн олон захилтай ерээбди. Өөрынгөө апсай­клингова мастерскойдо тэ­дэнээ хэжэ эхилээбди.

“Рукоделие легко” гэһэн бүлгэм Телеграм сүлжээн- дэ хараха аргатайт. Улаан- Үдэ хотын Бабушкинай үйлсын 14 а байшанай 315 таһалгада хүлеэн байнабди. 89644106334 гэһэн утаһаар хонходогты.

- Һайн даа! Үшөө ехэ амжалта туйлахыетнай хүсэнэбди.