Эрбэд «олошороо»

Буряад Уласта иимэ хэмжээ ябуулга табадахияа эмхидхэгдэһэн байна. Мүнөө жэлэй урилдаанда хүнүүд илангаяа олоор хабаадаба. Үхибүүдэй  наһанай гурбан бүлэгтэ 1150 ажал шүүгшэдэй үзэмжэдэ ороо. Тэдэнэй дундаһаа 30 илагшад элирүүлэгдээ.

- Манай урилдаан 2017 онһоо эмхидхэгдэнэ. Тиихэдэ оройдоол 200 гаран хүн оролсоо бэлэй. Бүхэдэлхэйн зэрлиг байгаалиин (WWF), “Мир вокруг тебя” гэһэн жасанууд урилдаа эмхидхэлгэдэ түрүүшын  үдэрһөө туһа нэмэри үзүүлээ. Буряад Уласай Байгаалиин нөөсэнүүдэй болон байгаали хамгаалгын, Болбосоролой ба эрдэм ухаанай яаманууд мүн лэ эдэбхитэйгээр оролсоо. Тиигэжэ олоной оролдолгоор хабаадагшадаймнай тоо олошороо, - гэжэ Түнхэнэй үндэһэтэнэй хүреэлэнэй захирал Баир Байминов мэдүүлнэ.

Һүүлэй байдалаар Буряад Уласта 9-10 толгой эрбэд ажамидарна гээд тоологдоно. Саяан хада уулаар табигдаһан видеокамерын зурагууд хараада абтана. Мүн саһан дээрэ гү, али газарта үлөөһэн мүрнүүдынь  шэнжэлэгдэнэ.

Бүхы дээрээ Ород гүрэн дотор 70-аад толгой эрбэд тоологдоно. Тыва болон Алтай Уласуудай дэбисхэр дээрэ тэдэ үзэгдэнэ. Тэндэ Буряадтал адлирхуу урилдаан эмхидхэгдэдэг гээд мэдүүлэе. Гэхэтэй хамта, Алтайда 2022 он эрбэдтэ зорюулагдажа, хамгаалгын олон  тоото хэмжээ ябуулга эмхидхэгдэһэн байна.

- “Эрбэдэй нютаг” гурбан шэглэлээр үнгэргэгдөө гээшэ. Хабаадагшад эрбэдые зураа, бүдөөр оёо, нооһоор нэхээ, модоор, түмэрөөр һиилэжэ бүтээгээ. Мүн олоор онтохонуудые зохёоходонь баярлаабди. Хүн бүхэн өөрынгөө ажалнуудые дуратайгаар хээ, зүрхэ сэдьхэлээ оруулаа, - гэжэ эрдэмэй болон экологическа болбосоролой таһагые даагша Анжела Ильина тэмдэглэнэ.

Уран зураашадай дунда Улаан-Үдэ хотын 2-дохи юрэнхы коррекционно интернат-һургуулиин Арсений Дмитручин, Гусиноозерск хотын “Сэлэнгэ” гэһэн нэмэлтэ һуралсалай гуламтын шаби Доминика Голикова болон Ахын аймагай Өөрлигэй дунда һургуулиин Виктория Самбялова гэгшэд түрүү һууринуудые өөр өөрын наһанай бүлэгүүдтэ эзэлээ.

Ахын аймагай Алдар Мунконов, Дмитрий Ертанов болон Түнхэнэй аймагай Дугар Аюшеев гэгшэд эгээл һонирхолтой онтохонуудые зохёоһон байна.

“Эрхим бүтээл” гэһэн шэглэлээр наһанай хоёр бүлэгтэ илагшад  тодороо. Эдэ хэд бэ гэбэл, Түнхэнэй аймагай Гужар һууринай сэсэрлиг-һургуулиин шаби Кирилл Томилов болон Ахын аймагай Өөрлигэй һургуулиин һурагша Бальжина Доржиева гэгшэд болоно.