Юрын зондо зорюулга

Мэнэ hая алтан дэлхэйдэ мүндэлжэ, «нара хараhан» номой түлɵɵлгэдэ Хурамхаанай аймагай Захиргаанай засаг дарга Леонид Будаев, Хурамхаанай аймагай соёлой таhагай дарга Тамара Монтоева, «Балдан Брэйбун» дасанай шэрээтэ Бато Шареев, Бултумурай дасанай шэрээтэ Баир Батоцыренов, Буряадай Уран зохёолшодой холбооной түрүүлэгшэ Сергей Доржиев, Буряадай элитэ уран зохёолшо Алексей Гатапов, Россиин Уран зохёолшодой холбооной гэшүүн Елизавета Бильтрикова, номой эбээн тэдхэгшэ, меценат  Станислав Гармаев болон авторай түрэлхидынь, нүхэдынь болон уншагшад хабаадаhан байна.

         Юрын үгын хэшэгтэй

«Буддын шажан тухай юрын үгэнүүдээр» гэhэн ном Олег ламхайн hүүлэй 6-7 жэлэй туршада hүзэгшэдэй асуудалнуудта харюусажа, Интернедэй социальна бүлгэмүүдтэ толилогдоhон ниитэлэлнүүдhээ бүридэнэ. Тиихэдээ буддын шажанай гүн ухаанай орёо ба гүнзэгы удхатай   hургаалнууд  юрын хүндэ ойлгосотой ба hонирхолтойгоор бэшэгдэhэн. Шареев Бато ламхай иигэжэ онсо тэмдэглэhэн байна:

- Мүнɵɵ үедэ Буряад орондо хамтадаа 40-ɵɵд дасанай шэрээтэнэр буянта хэрэгүүдые үйлэдэнэбди. Тэдэнэй тоодо Бурханай номуудые сэхэ оршуулдаг эрдэмтэй ламанар бии. Энэ хадаа айхабтар орёо ба бэрхэшээл ехэтэй хэрэг юм даа! Харин гансал Олег ламхай тэдэниие ɵɵрын юрын хэлээр олондо ойлгуулжа бэшэдэг тусхай оюун бэлигтэй.

Дасанда абарал, айладхал гуйжа ерэhэн hүзэгшэдтэ ямар  нэгэн нангин hургаалай удха шанарые тодоор ойлгуулхын хэрэгтэ бэрхэшээлнүүд нэгэтэ бэшэ ушардаг. Тиимэhээ Олег Намжиловай  хэблэhэн тус ном юрын hүзэгшэдhɵɵ гадна лама санаартандашье ехэ хэрэгтэй гэжэ тоосоогүй.

Энэ ном буддын шажанда hүзэгтэй айл бүхэндэ нангинаар хадагалагдажа, үдэр бүхэндэ уншагдажа байха ёhотой сэнгүй хэблэл! Һургуулиин наhанай үхибүүдэйшье, үндэр наhатай үбгэд хүгшэдэйшье адли зэргэ ядамаргүй ойлгожо, hонирхожо уншаха ном буряад арадай ба бурхан шажанай ёhо заншалнуудай алтан абдарые баяжуулба!

         ЛАМА, БЛОГЕР, УРАН ЗОХЁОЛШО

Намжилов Олег Найданович 1972 ондо Баргажанай аймагай Борогол нютагта түрэһэн юм. Дунда hургуулиин удаа сэрэгэй алба гараа, удаань Ивалгын дасанай буддын шажанай университет амжалтатайгаар түгэсхэhэн намтартай.

«Сэгэнүүдэй Масандай хаанай аяншалганууд», «Чингис хаанай Баргут», «Соодой ламын мүрɵɵр», «Буддын шажанай түүхэнүүд», «Сансарын бадаршан» гэhэн номуудай автор мүн.

Тэрэнэй хажуугаар Олег Намжиловай зохёоhон хүгжэм, үгэнүүдтэй дуунуудай видео – клипүүд, буддын шажанай түүхэнүүдтэй видеофильмүүд буулгагдаhан. Мэдээжэ блогерой социальна бүлгэмүүдэй, ютуб – каналай олон мянган аудиторинь үдэр бүри шэнэ мэдээнүүдые хүлеэдэг. Yшɵɵ олон мянгаад хүнүүд Олег Намжиловай үдэр бүриин зурхай хүлеэжэ, тэрэнэй зүбшɵɵлнүүдээрнь хуби заяагаа заhан зохёодог заншалтай.        

Баяр ёhололто хэмжээниие Олег Намжиловай зохёоhон уянгата дуунууд шэмэглээ, амаршалгын дулаахан үгэнүүд, буян хэшэгэй үреэлнүүд зэдэлээ.