936
Буряадай болбосоролой болон эрдэм ухаанай сайдай орлогшын уялгануудые гүйсэдхэгшэ Батор Цыренжапов энэ хуралдаа хүтэлөөд, иигэжэ элидхээ: “1992 ондо Сурхайта нуурай эрьеһээ эхиеэ абаһан Буряадай Эдир сэдхүүлшэдэй эблэл мүнөө дээрээ мянгаһаа үлүүтэй үхибүүдые нэгэдүүлнэ, ясли-саадайшье багашуулые хабаадуулна. Юрэнхы һуралсалай дунда һургуулинуудай дэргэдэ ажалаа ябуулдаг редакцинууд, студинууд бултадаа Лигын бүридэлдэ ороно. Үхибүүдые эдэбхижүүлэн, захёохы шадабарияа хүгжөөлгэдэнь ёһотоор нүлөөлнэл даа”.
Буряад Уласай Арадай Хуралай Түрүүлэгшын орлогшо Татьяна Мантатовагай тэмдэглэһээр, Эдир сэдхүүлшэдэй эблэлэй гэшүүд наһанайнгаа мэргэжэл шэлээд байна гэхээр бэшэ. Тиибэшье олоһон дүршэлынь саашанхи ажабайдалдань туһатай байха. Үндэр тушаалтан амаршалгын үгэнүүдые хэлээд, Буряадай Эдир сэдхүүлшэдэй эблэлые ударидагша Людмила Доржиевада Баярай бэшэг барюулаа.
Энэ хуралдаанда Москваһаа зорижо ерэһэн педагогикын эрдэмэй доктор, ЮНПРЕСС нэгэдэлэй юрэнхылэгшэ Сергей Цымбаленко, Примориин Эдир сэдхүүлшэдэй эблэлые ударидагша Татьяна Никитченко гэгшэдэй элидхэлнүүд олоной анхарал татаа.
“Бүхэроссиин Эдир сэдхүүлшэдэй эблэл баһал 30 жэлэй саана Владивостогой “Океан” лагерьта байгуулагдаһан. Тэрэ гэһээр Буряадай эблэлтэй эб хамта алхална”, - гэжэ Сергей Цымбаленко тэмдэглээд, һонин-һонин баримтануудые дуулгаа. Жэшээнь, Францида эдиршүүлэй түрмэдэ үхибүүд камераһаа далтирхыень адаглаһан байна. Эхын хараса шэнгеэр эдиршүүл видеокамерые мэдэрээ юм ха. Олондо мэдээсэлгын түхэлнүүдэй нүлөө гүнзэгы шэнжэлгэ хүлеэһээр гэжэ эрдэмтэн ойлгуулна.
Автор: Сарюуна ЭРДЫНЕЕВА
Фото: Буряад Үнэнэй архивһаа
