1151
Яруунын аймагһаа уг гарбалтай Баир Цыренович олон жэлэй хугасаада Байгал далайн хойто захада ажаһууна. Суута БАМ-ай харгын дэргэдэхи Буряадай нютаг нугануудта, түрэл болоһон Северобайкальск хотодо, мүн бүхы Буряад Уласта бокс хүгжөөлгын талаар нилээн ехэ хубитаяа оруулһан хүн гээшэ.
Боксын багша Баир Дандаровай 7 шабинар “Спортын мастер” гэһэн нэрэ зэргэдэ хүртэһэн намтартай. Бэлигтэй һоригшо олон тоото хүбүүд, басагадые зүб харгы руу оруулжа шадаһан юм.
Һүүлэй 30 гаран жэлэй туршада Северобайкальск хотодо регион хоорондын олон тоото мүрысөөнүүд үнгэргэгдөө. Баир Цыренович эдэ бүгэдые эмхидхэхэһээ гадна, залуу һоригшодтой дүй дүршэлөөрөө ходо хубаалдажа байдаг. БАМ-ай харгыгаар оршодог нютаг нугануудай үхибүүд, ехэшүүлшье эдэ мүрысөөнүүдтэ дуратайгаар хабаададаг заншалтай. Красноярскын, Үбэр Байгалай хизаарнуудай, Эрхүү можын түлөөлэгшэд нэгэтэ бэшэ эндэхи ринг дээрэ гараһан юм.
«Уласхоорондын Боксын федерациин (IBA) шүүгшэ» гэһэн нэрэ зэргэтэй Баир Цыренович уласхоорондын, бүхэроссиин хэмжээнэй мүрысөөнүүдтэ ахамад шүүгшээр шадамар бэрхээр хүдэлдэг.
Баир Дандаровые үндэр нэрэ зэргээрнь амаршалаад, үшөө ехэ амжалтануудые туйлажа, урагшаа һанаатай шабинарые хүмүүжүүлхыень Северобайкальск хотын захиргаан, бүхы ажаһуугшад хүсэнэ.
“Мой Северобайкальск” сонинһоо
Фото: Борис Балдановай дурадхаһан гэрэл зураг
