![](/upload/resize_cache/iblock/493/780_780_1/xngwkeaqxcv6f6hxtvxkks1ejq2hht17.jpg)
«Буряад ТВ» Монгол ороной гурбан томо теле-субагуудтай хамтын ажал эрхилхэ тухай хэлсээ һаяхана, тодорхойлходо, Ородой хэблэлэй үдэртэ, баталаа һэн гээд һануулая.
- Монголой үндэһэтэнэй радио ба телевидениин (MNB) юрэнхы захирал Агваандаш Бүрэнбаатарай дэмжэлгэ туһаламжаар Монгол ороной Архангай аймагаар ажалаараа ябаха үедөө монгол үүлтэрэй моридые шэнжэжэ үзөөб, - гэжэ «Буряад ТВ»-гэй захирал Виталий Раднаев хөөрэнэ. – Бүхэли үдэрөө талада үнгэргөөбди, арад зониие сурбалжалаабди, нүүдэл һуудалтайнь танилсаабди, юрэдөө, Архангай нютагай үнгэ үзэмжөөр хужарлаабди. Ажалайнгаа эсэстэ Бүрэнбаатар дарга намда монгол үүлтэрэй гунан азарга бэлэглэжэ гайхуулаа.
«Буряад ТВ»-гэй хүтэлбэрилэгшэдэ һүүлдэнь ойлгуулжа үгэһөөрнь, монголшууд үни урда сагһаа хойшо хүндэтэй айлшадтаа мори бэлэглэдэг заншалтай юм. Энэ бэлэгынь монгол ба буряад зоной эб найрамдалай, тэдэнэй хоорондохи ашаг үрэтэй харилсаанай һүлдэ болоно.
- Монгол нүхэдэйнгөө мандаа айлшалхыень, Байгал далайда амархаяа ерэхыень тэшэ ядан хүлеэнэб. Мүншье мэдээсэлэй-аяншалгын һалбарида бүтээхээр хэлсэһэн хэрэгүүднай урагшатай байха гэжэ этигэнэб, - гээд, Виталий Раднаев нэмэнэ.
Фото: Виталий Раднаевай дурадхаһан гэрэл зураг