Ялада унабал-хармаан хооһон

Теэд зарим нэгэн ялада ороһоноо өөрөөшье мэдэнгүй байжа, ялынгаа мүнгэ түлэнэгүй, зарим нэгэн һайн мэдэжэ байгаад, һайн дураараа түлэнэгүй. Тиихэдэнь сүүдэй гаргаһан шиидхэбэреэр зэмэтэниие нэхэдэг албанай мэргэжэлтэд үритэй зониие бэдэрдэг һэн. Харин мүнөө ялада унаһан эрхэтэнэй банкын счёт дээрэһээ мүнгэниинь сэхэ хороогдожо байха болобо.

-Харгын дүрим эбдэһэн жолоошодые оньһон түхеэрэлгэ өөрөө  элирүүлээд, штраф абаха. Тиихэлээрээ бидэнэй ажалшадта һураггүй хүнгэн болохо, - гэжэ Буряадай ахамад пристав Пётр Ертанов хэлэнэ.

Харгын дүрим эбдэһэнэй түлөө ялада унаад, тэрэнээ саг соогоо түлэдэггүй зоной тоодо жолоошод  ороно. 2022 ондо сүүдэй  гаргаһан шиидхэбэреэр 100 сая түхэригһөө дээшэ мүнгэ зэмэтэниие нэхэдэг албанай мэргэжэлтэд суглуулаа.

-Буряадтамнай ялада унаһан аад, мүнгэеэ түлэдэггүй нэгэ эрхэтэн байха. Тэрэ 170 дахин харгын дүрим эбдээ,  148 мянган түхэригэй ялада унаа. Тиимэ зониие хэһээгээгүй һаамнай,  арад зон бүри нэтэрнэ ааб даа, - гэжэ ахамад пристав Пётр Ертанов хэлэнэ.

 Жэлһээ жэлдэ харгын үридэ ороһон жолоошодой тоо олошорно.  Нёдондо 1 сая 145 мянган ушар бүридхэгдөө, мүнгэнэй хэмжүүрээр 6,5 млрд болоно.