Буряад орондо Намжил Нимбуевай хүшөө бариха дурадхал оруулагдаба

Эндэ һаяхана Любовь Шираповна Буряадай Толгойлогшо Алексей Цыденовтэ орожо, энэ асуудал зүбшэлсөө.

- Уласай Толгойлогшодо орожо, Намжил Нимбуевай түрэһөөр 75 жэлэй ойдо зорюулан, Улаан-Үдэдэ хүшөө бодхоохо тухай дурадхал оруулааб, - гэжэ ирагуу найрагшын эгэшэ хөөрэнэ. – Гансаараа бэшэ, Оюна Зориктуевна Нимаеватай ябааб. Тэрэ Намжил Нимбуевай абьяас бэлиг аргагүй ехээр хүндэлдэг хүн юм. Хармаандаа абаад ябахаар жаахан хэмжүүртэйгээр номыень гаргалсаа һэн. Алексей Самбуевичта тэрэ номоо бэлэглээбди. Толгойлогшо бидэниие анхаралтайгаар шагнаһанай удаа ерэхэ жэлдэ Улаан-Үдын Захиргаантай хамта энэ асуудал шиидхэхые дурадхажа баярлуулаа.    

2018 ондо Намжил Нимбуевай дурасхаалда нютагтань, Яруунын аймагта, удаань тэрэл жэлдэ Болгариин Плиска хотодо ирагуу найрагшын сээжэ баримал (бюст) табигдаа һэн гэжэ һануулая.  

Намжил Нимбуев хара залуугаар наһа бараашье һаа, уншагшадай сэдьхэл дулаасуулха мүнхэ мүрнүүдые бэшэжэ шадаа бшуу. Наһаниинь ошон мэтэ ялагас гээд үнгэрбэшье, Буряадай уран зохёолой түүхэдэ арилшагүй мүр сараа болон үлөө.