Байгаали бузарлагдаһаар

Оршон тойронхиие хэдэн 10-аад жэлэй туршада бузарлажа байдаг энэ нуур усадхаха тухай хэлсээн үе-үе болоод лэ эхилдэг. Сэбэрлэлгын ажал хойшолуулагдана гэжэ «Арадай фронт» ниитэ хүдэлөөнэй түлөөлэгшэд адаглажа, Буряад Уласай прокуратурада гомдол барибад.

ЛВРЗ олон жэлэй туршада фенолтой үлэгдэлнүүдээ тиишэнь хаядаг байгаа. 2005 ондо энэ ябадал хорюулагдаһан юм. Олониитын хүдэлөөнэй гэшүүдэй тэмдэглэһээр, оршон тойронхидо бүхыдөө 1,69 млрд түхэригэй хохидол ушаруулагдаа. 2015 ондо сүүдэй шиидхэбэреэр ОАО «РЖД» болон АО «Желдорреммаш» эмхи үлэгдэлнүүдые усадхаха ёһотой болоо һэн. Тэрэ гэһээр ямаршье ажал хэгдээгүй. Уһантай холижо хаягдаһан үлэгдэлнүүд яһала ехэ болонхой. Тэндэхи уһаниинь газарта шэнгэхэдээ, уһа голнуудые бузарлана гэжэ ойлгохо хэрэгтэй.

Ниитын хүдэлөөнэй түлөөлэгшэдэй хандалга анхаралда абтажа,  ажал түргэдэхэ бэзэ.