Арадуудай хани барисаа бэхижүүлгэдэ өөрынгөө хубита оруулһанайнгаа түлөө Дамба Аюшеев иимэ үндэр шагнал хайрада хүртэбэ.
Буддын шажанай заншалта Сангхын хамба лама Дамба Аюшеев энэ тушаал эзэлжэ һууха үедөө Буряадайнгаа бүхы дасангуудые һэргээжэ бодхооһон намтартай. Түрэл буряад арад түмэнэйнгөө ажабайдалда һанаата боложо байдагаараа мэдээжэ. Хэдэн жэлэй урда засаг баригшадай дэмжэлтээр «Ниитын хонин һүрэг» гэһэн түсэл байгуулаад, тэрэнээ амжалтатай бэелүүлнэ. Гадна «Эрын гурбан нааданиие» үндэр хэмжээндэ үргэлсөө. Мүнөө дасанайнгаа дэргэдэ урданайнгаа ажал һэргээжэ, арһа элдэлгын болон шэрдэг даралгын цех хүдэлүүлнэ. Түрэл хэлэнэйнгээ хүгжэлтэдэ нэмэри оруулһан түсэлнүүдые байгуулһаншье.
Фото: https://newbur.ru/