Олоной ажахы «Одон» мэтэ гү?

- Сайн байна. Цырен-Пунсэк Тумэнович, минии мэдэхээр, хүдөө ажахытай ехэ холбоотойгоор һүүлэй жэлнүүдтэ хүдэлөөт. Манай уншагшадта өөрыгөө мэдүүлыт. Нютагаараа хаанахибта? Хаана һургуули һудар абаабта? Ямар мэргэжэлтэйбта?

- Би хадаа Цырен-Пүнсэк гэжэ нэрэтэйб. Мухар-Шэбэрэй аймагай Хүсөөтэ нютагта түрэһэнби. Нютагайнгаа дунда һургуули 2001 ондо дүүргэһэнби. Мүнгэн медальтайгаар. Тэрэнэй һүүлдэ БГСХА-гай экономическа факультет түгэсхөөб. 2006-2007 онуудта армида алба хээд ерээб. Русьбанкда операционистаар хүдэлөөб. 2009-2014 онуудта судебнэ приставээр федеральна албанда хүдэлһэн байнаб. 2015 оной январь һараһаа 2019 оной июнь болотор Буряад Уласай Хүдөө ажахын ба эдеэ хоолой яаманда экономистаар хүдэлөөд, Хүдөө ажахын коопераци хүгжөөлгын жасада захиралай орлогшоор дэбжүүлэгдэһэнби. Үнгэрһэн жэлэй эсэс багаар өөрынгөө фермерскэ ажахы нээгээд, хүдөө ажахын “Одон” кооперациие толгойлжо эхилээб.

- Хубиингаа ажахые «Одон» гээд нэрлэһэнтнай баһа нэгэ удхатай бэзэ? Тиимэ гү? - Совет үедэ «Одон» гэжэ нэрэтэй баян гэгшын совхоз Хүсөөтэдэ байгаа. Түрэһэн эсэгэмни тэндэ хүдэлһэн. 1990-ээд онуудта Тумэн Гомбоевич сомон дарга ябаа. Наһан болонхой. Нютагаархиднай эсэгыемнай ходо дулаанаар дурсан байдаг. Нэрыень мүнхэлһэн хэмжээнүүдыешье Хүсөөтэдөө эрхилдэгбди. Эжымни – Роза Цыден- Ешиевна.

Ажахыгаа хайшан гээд нэрлэхэ тухай нилээд бодожо үзөө хүм. “Одон” гээд лэ нэрлэхэ гэжэ шиидээб. Кооператив байгуулаад, малай улай хэхэ пункт нээгээ һэм - бүри 2020 ондо. Ажалшадые абааб. Социальна эмхи зургаануудта – һургуули ба сэсэрлигүүдтэ, Мухар-Шэбэрэй түбэй больницада - ганса аймаг соогуураа бэшэ, мүн Улаан-Үдэдэшье мяха худалданабди.

- Танда эдэ бүгэдэдэ дахуулан һургаха, хүтэлхэ хүн бии бэзэ?

- Ахайтай хүм. Цырен-Гарма ахаймни «Надежда» гэжэ хубиин олзын хэрэгтэ олон жэлдэ хүдэлһэн. Мүнөө үмсын болоод гаранхай. Хоёр томо убойно түб баринхай - Агын Дулдаргын аймаг дээрэ, мүн Шэтын хажуудахи Макеево тосхондо.

- Бүхы һайн һанаагаараа хүдөө нютагаа һэргээхэ гэжэ шармайнат. Эгээл тиимэһээ праймеризта оролсожо, бэеэ мэдүүлхэ гэжэ шиидэбэт гэжэ ойлгобоб. Һара тухай саана Донбасс ошоод ерээт гэжэ дуулаһан байнаб.

- Нютагаймнай хүбүүд туһа эриһэн байгаа. Танк юумэнэймнай поли дээрэ һалашахадань, тиишээ 50 км саана ябагаар ошохонь гайтай байна гэжэ хэлээ. Түргөөр ошоод заһахын тулада машина хэрэгтэй болоод, «Боевое братство» эмхиин хүтэлбэрилэгшэ Жамбал-Жамса Жанаевай тиишээ ошохом гэжэ байхадань, би баһа даралдааб. Мартын 15-да Донбасс хото зорёобди. Ростов нютаг дээрэ машина абаад, хилэ дабаад, 5-дахи танково-ремонтно батальоной хүбүүдтэ хэрэгтэй хубсаһа хунар, гутал машинада ашаад, Донецкэ можын Старобешевскэ аймагай Новый Свет тосхондо сэрэгшэдтэеэ уулзажа, абаашаһан бэлэгээ барюулһан байнабди.

«Боевое братство» эмхиин хүтэлбэрилэгшэ Жамбал-Жамса Жанаевта ехэ баярые хүргэхэ байнаб. «Байкал-03» гэжэ һайн дуратанай батальондо Баир Намдакович Долгоров ехэ гэгшын ажал ябуулжа байна. Байлдаанай эгээл дүлэн соогуур ябажа, гэрһээнь эльгээгдэһэн бүхы посылкануудые сэрэгшэ бүхэндэ гартань барюулжа байна. Тиимэ ехэ ажал хэжэ байһан хүбүүдтээ баярые хүргэхэ байнаб. Манай хүбүүд машинатай болоһондоо ехэл баяртай үлөөд һэн.

- Хошуун-Үзүүрэй хүбүүнтэй зогсожо байнат гэжэ гэрэл зурагта танижархибабди. Тэдэмнай хэр бэ?

- Буряадууд шанга ябажа байна. Олон хүнүүдтэй хөөрэлдэхэдэм, буряадууд шангашуул гэнэ. Хальмагшье, яхадшье, ородшье яһатан буряадуудые ехэ магтана. Тиихэдэнь манай хүбүүд дайн боложо байна гэжэ балай тооношьегүй. Урмаа таһараагүй ябанал даа. Ошоод, өөрынгөө нюдөөр хараад ерээб.