Уларилнай гайхуулһаар

- Саһатайгаар холигдожо байгаад ороһон бороогой хойшолонһоо боложо, Пыхта гэдэг газарта харгы зарим унаануудта хаагдаба. Тэрэ үндэр хадын оройгоор ехэ саһан ороо бшуу. Харгы мүльһэтөө. Энээнһээ боложо, аюул боложо магадгүй. Саһа арилгадаг элдэб унаанууд тэндэ ажаллана, - гэжэ уласай Харгын болон унаагай талаар яаманай мэргэжэлтэд дуулгаба.

Гэхэтэй хамта хур бороотой, саһа бордоһотой уларил Буряад Уластамнай тогтоһоор.

- Урда аймагуудаар майн 20-ой һүни бороон, саһан орохоор багсаамжалагдана, - гэжэ уларил шэнжэлэгшэд хэлээ.

Бүхыдөө дэлхэй дээрэмнай уларил ондоо болоо, сэбдэг хүйтэн далайн мүльһэн хайлажал байна гэжэ эрдэм шэнжэлэгшэд хэлсэдэг болонхой. Үнэхөөрөөшье, мүнөө мойһон үни хада сэсэглэжэ байха аад, набшаһаншье үгы. Үбэлнай шэрүүн байдаг аад, яһала дулаанаар үнгэрдэг болоһон тухай хүн зон хэлсэдэг.