Багшын мэргэжэл шудалжа...

 Шэнэ гуримаар

Сентябриин 1-дэ буряад отделе­ниин шэнэ 111-дэхи группа бии болоо һэн. Тиигээдшье оюутанай шэнэ гу­рим дүүргэгдэжэ эхилээ. Түрүүшын хахад жэл соо бэе бэетэйгээ дүтөөр танилсажа, хэмнай ямар нютагһааб, зан забдань ямар бэ, нүхэсэжэ боло­моор гү гэхэ мэтэ асуудал гаражал байдаг бэлэй.

Хамтын байрада табаараа нэгэ комната соо байдаг һэмди, журам ехэ шанга, үглөөгүүр 7 сагта бодохо, студсоведэй гэшүүд үглөө бүри ариг сэбэрые шалгаха, гадна комендант комната соо орожо хараха. Иимэшье байһаниинь болоо гэжэ мүнөө һа­нагдана. Хэшээлдээ хожомдожо ябаха оройдоо толгой соомнай бай­даггүй һэн. Комсомолой дарга Катя Изосимова ехэ бэрхэ, шанга, журам гээшые сахиха – нангин уялга гэжэ ойлгуулдаг һэн.

Манай 111-дэхи группые Дулма Дарижапова даажа абаа. Жэл уда­ридажа ябаа һэн. Энэ жэл соо бидэниие яһала эбтэй эетэй болгоо, эл­дэб темээр хөөрэлдөө үүсхэхэ, экс­курсида театр ба музей абаашаха, ба­сагад яагаад аятайханаар хубсалхаб, хайшан гээд үдэрөө зүбөөр үнгэр­гэхэб, нэгэ үгөөр - оюутан ямар байха ёһотойб гэжэ ойлгуулдаг һэн. Хо­жом Надежда Матвеевна хоёр жэл- дэ кураторнай байгаа. Клавдия Ва­сильевна 4-дэхи курсда гарахадам­най даажа абаа. Багшанарнай ехэл оролдосотой, оюутан бүхэнэй түлөө зобожо, өөрын үхибүүд шэнги хара­жа ябадаг бэлэй.

50 жэл болоод...

2023 ондо училищи дүүргэһээр 50 жэл болобобди. Майн 3-да 13 хүн энэ ушараар уулзалга үнгэргөөб­ди. Уулзалгада суглархадаа, һана­ха юумэмнай ехэ олон - энеэдэтэй ушарнуудшье, энэ хугасаа соо яма­раар ябаһанаа дурсаа, хүн бүхэн хэ­лэхэ үгэтэй байгаа. Талаан бэлигтэй, эсэхэ сусахые мэдэнгүй ажалладаг хүндэтэ багшанараа дурдажал бай­гаабди. Тоо бодолго Анна Данчинов­на, буряад хэлэ ба литература Дари­ма Тумуновна, ород хэлэ ба литера­тура Надежда Матвеевна, биологи ба хими Антонида Александровна, атеизм ба түүхэ Александр Павло­вич, тамирай багшанар Валентин Иванович, Вячеслав Тихонович, дуу ба дирижировани Ася Павловна, мандолина дээрэ наадахые Бэрта Иосифовна, гар ажалай хэшээл Ири­на Борисовна, зуралга, англи хэлэ, педагогико хэн заагааб, нэрэ обо­гыень мартааб, немец хэлэ Эльвира Ангаевна, психологи Калерия Афа­насьевна, физикэ Захар Иванович заагаа һэн. Нэгэ үгөөр хэлэхэдэ, омог дорюун, шударгы бэрхэ багшанар бидэниие багшанарай үргэн харгы замда гаргаа.

1973 оной июньдэ 29 басагад һу­ралсалаа түгэсхэжэ, направленеэр ажаллахаяа холо ойрын һургуули­нуудаар ошоо һэмди.

Эхин һургуулиин багшаар наһа­найнгаа амаралтада гаратараа, Да­рима Раднаева, Пурбо-Ханда Цыбде­нова, Цырен-Ханда Ринчинова, Да­рима Аюшеева, Света Намсараева, Маша Очирова, Таня Санжиева, Нор­жима Сабсаева, Дари-Дулма Доржи­ева хүдэлөө. Света Отсорова Зэдын аймагай Дээдэ Ториин һургуулида 13 жэл захиралаар, удаань 7 жэл захи­ралай орлогшоор ажаллаа. Ажалдаа ехэ оролдосотой, хүндэтэй ябаа. Ехэ ангида географиин багшаар Женя Лудупова, ород хэлэ болон литерату­рын багшаар Валя Бальжинимаева, буряад хэлэ, литература Намжилма Дандарова, Бальжидма Субботина заагаа. Цымжит Дагбаева соёл гэ­гээрэлэй хүдэлмэрилэгшэ болоо. «Буряад Уласай соёл гэгээрэлэй га­бьяата хүдэлмэрилэгшэ» гэһэн нэрэ зэргэтэй. Түүхын багшаар Марина Цырендоржиева, Дарима Дашидор­жина, Дылыгма Самбуева ажаллаа.

Тиихэдэ Дылыгма Самбуева мү- нөө хүрэтэр түүхын багшаар хүдэлһөөр. “Буряад Уласай багшанарай манлай”, “Буряад Уласай эрхим баг­ша – 2009-2010” гэһэн урилдаануудта илагша юм. Һурагшадынь ОГЭ болон ЕГЭ һайнаар тушаадаг.

Маша Очирова, Таня Санжиева, Норжима Сабсаева, Света Отсорова, Дылыгма Самбуева, Марина Цырен­доржиева, Дарима Раднаева, Света Намсараева Буряад Уласай ба Рос­сиин гэгээрэлэй хүндэтэ нэрэ зэр­гэнүүдтэ хүртэнхэй.

Алтан дэлхэйн жама ёһоор

Арад зондоо ном заадаг

Аргагүй оролдосотой багшанартаа

Айхабтар ехэ баярые хүргэнэбди.