Буряад Уласта ойн түймэрэй тоо ба талмай хоёр дахин бага болоо

Апрелиин 14-нэй байдалаар, Буряад Уласта 1100 гектарай талмайда найман түймэр бүридхэлдэ абтаба. Буряад ороной дэбисхэр дээрэ гараһан түймэрнүүд амаралтын үдэрнүүдтэ хоёр дахин бага болоо. Гэбэшье дулаан уларил тогтожо, хүнэй гэмээр түймэр гаража болохо. Буряад Уласай Толгойлогшо Алексей Цыденов ажаһуугшадта хандажа, һэргылэмжэтэй байхые уряалба.

Мүнөө ой модоной жасада, һууринуудта галай аюул үзэгдэнэгүй. Һаяын үдэрнүүдтэ 23 градус болотор дулаарха. Буряад Уласай Толгойлогшо Алексей Цыденов ажаһуугшадые, уласай айлшадые аюулгүйн байдал сахихые уряалба.

- Агаарай температура энэ үдэрнүүдтэ 20 градусһаа дээшэ гараха. Ногоон хуурай, тиимэһээ түймэрэй аюул ехэ. Түүдэг носооһоной, тамхи унтараангүй хаяһанай хойшолонгууд аймшагтай, хэдэн зуугаад гектар ой модон шатаха, тосхон һуурингуудта аюултай байдал тогтохо, - гэжэ Алексей Цыденов хэлэбэ. 

Буряадай Толгойлогшын һануулһаар, 2017 оной апрель һарын эсэстэ ехэ халуун уларил тогтожо, Байгал шадарай аймагай Черемушки тосхоной ажаһуугшад хохидолдо ороһон байна. Загаһашад Котокель нуурай эрьедэ түүдэг носоогоо, тиин тэрээнһээ боложо, 20 гаран гэр шаташоо һэн.

Мүнөө Буряад Уласта түймэрһөө һэргылэлгын онсо гурим тогтоогдоо, ой руу орохонь, гал носоохонь хорюултай.