136
Космонавтикын үдэртэ Буряад Улас ба Монгол гүрэниие Уласхоорондын замбуулинай станцитай холбоһон түрүүшын сэхэ эфир үнгэргэгдэбэ.
Буряад Уласай Толгойлогшо Алексей Цыденовэй үүсхэһэн түсэл Роскосмос дэмжэжэ, AIST Global гэжэ орос-монгол теле-субагтай хамта бэелүүлбэ. Телемост "Союз-39" гэжэ гайхамшагта экипажай ниидэлгээр баталагдаһан Росси, Монгол гүрэнүүдэй хани барисаанай һүлдэ тэмдэг болобо. Тэрэ сагта Монгол улас замбуулин руу эрхэтэнээ эльгээһэн дэлхэйн 10-дахи гүрэн болоо һэн, харин Жугдэрдэмидийн Гуррагча замбуулинда ниидэһэн гүрэнэй түрүүшын, мүнөө болотор ори ганса эрхэтэн болоно. 44 жэлэй удаа Советскэ Союзай Герой Жугдэрдэмидийн Гуррагча МКС-тэй агаарай долгёор холбоо барижа, нэгэ ажалтанаараа харилсаба.
«Бидэ, ород ба монгол арад, ходо сугтаа ябанабди. Замбуулинай түүхын холо урда тээ, Монгол гүрэндэ тохёолдоһон бэрхэшээлтэй жэлнүүдтэ, 1939 ондо, мүнөөдэршье бидэ сугтаабди. Хүндэтэ космонавтнууд, таанадта бүхы һайниие хүсэнэб. Түсэблэгдэһэн программануудаа дүүргэжэ, гоё һайхан газар дэлхэйдээ бусажа ерэхэтнэй болтогой. Аргын болоо һаа, Монгол гүрэнэй дэбисхэр дээрэ буужа ерыт!», - гэжэ Советскэ Союзай Герой Жугдэрдэмидийн Гуррагча МКС-эй экипажда хандаба.
Россиин Баатар, летчик-космонавт Сергей Рыжиков, космонавт-туршагшад Алексей Зубрицкий ба Кирилл Песков гэгшэд сэхэ агаарай долгёор хэмжээ ябуулгада хабаадаа. Сергей Рыжиков орбита руу гурбадахияа ниидэбэ.
«Бидэ мүнөө Номгон далайн урда талаар ниидэжэ ябанабди. Дэлхэйн эгээ гоё газар нэрлэхэнь орёо байна. Юундэб гэхэдэ, бүхы газар дэлхэй аргагүй гоё. Росси аргагүй гоё, Монгол гүрэн мүн гоё. Газар дэлхэйнгээ гоё һайханиие замбуулинһаа хаража, бүри ехээр дурланабди», - гэжэ Сергей Рыжиков эдир харагшадтай хубаалдаба.
Буряад Уласай Толгойлогшотой хамта Эдир технигүүдэй станциин үхибүүд, Алас Дурна дотор ори ганса «Замбуулин альган соо» гэһэн экспозициин автор Леонид Симухин Улаан-Үдэ хотын Түүхын музейһээ космонавтнуудтай холбоо барижа харилсаба.
«Замбуулин нэн түрүүн бидэ нээгээбди, энээн тухай дэлхэй бү мартаг. Үхибүүдтээ энээн тухай мүн һануулха дуран хүрэнэ. МКС-тэй, Монгол гүрэнтэй онлайн-уулзалга эмхидхэхэ арга боломжын түлөө Дмитрий Владимирович Бакановта баяр хүргэнэб. Хэмжээ ябуулга манай холбоо, манай хани барисаа гэршэлээ. Мүнөөдэр Росси гүрэндэ шэнэ космодромууд, ракетануудай шэнэ янзанууд байгуулагдана. Урагшаа бидэ дабшаһаарбди. Манай үхибүүд, бүдүүн зон, бүхы дэлхэй энээн тухай мэдэхэ ёһотой, - гэжэ Буряадай Толгойлогшо Алексей Цыденов хэлэбэ.
Бодото космонавтнуудтай үхибүүд анха түрүүшынхиеэ харилсаба.
«Манай космонавтнуудгүйгөөр иимэ олон амжалтануудые туйлахагүй байгаабди. Тэдэ эрхимэй эрхимүүд, ами наһаяа хайрлангүй замбуулин руу ниидэжэ, мэдэгдээгүй юумэнүүдые шэнжэлэлнэ. Би тэдээнээр омогорхоноб», - гэжэ Никита Любовников һанамжануудаараа хубаалдаба.
Уласхоорондын түрүүшын телемост Роскосмосой, Монгол гүрэндэ Оросой Холбоото Уласай элшэн сайдай албанай дэмжэлгээр орос-монгол AIST Global теле-субагаар дамжуулагдаба.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
