Буряад Уласта Майн 1-нэй һайндэртэ зорюулагдаһан митинг болоо

Майн 1-дэ Улаан-Үдэ хотын «Юбилейный» гэжэ соёлой ба амаралгын сэсэрлигтэ «Доблестный труд – гарантия Победы» гэһэн Хабарай ба Ажалай һайндэртэ зорюулагдаһан тоглолто үнгэргэгдэбэ. Хэмжээ ябуулгада Буряад Уласай Толгойлогшо Алексей Цыденов, сэрэгэй тусхай үйлэ хэрэгүүдэй ветеранууд, уласай эмхи зургаануудай мэргэжэлтэ нэгэдэлнүүд, ажалай коллективүүд, ажаһуугшад ба ниислэлэй айлшад хабаадаа.

- Буряад орондо баригдажа, үйлэдбэрилэгдэжэ байһан бүхы юумэн танай ажалай дүн болоно. 2019 онһоо хойшо манай уласта үйлэдбэри 32 хубяар дээшэлээ. Хорото үбшэнэй дэлгэрээшье һаа, элдэб санкци хашалтануудай тохёолдоошье һаа, бидэ урагшаа дабшаһаарбди. Хэжэ байһан ажалнай бүтэсэтэй байг лэ. Хүбүүднэй илалта туйлажа, түргэн гэртээ бусажа, амгалан тайбан оршондо ажалаа хэжэ эхилхэнь болтогой. Манай үхибүүд һайн юумэ хаража үндыхыень хүсэнэб. Бата этигэлтэй урагшаа дабшая, жэл бүри Хабарай ба Ажалай һайндэр шэнэ туйлалтануудтайгаар угтая, - гэжэ Алексей Цыденов амаршалба.

«Үргэн даа минии түрэл орон» гэһэн тоглолтын программада соёлой эмхи зургаануудай уран һайханай бүлгэмүүд, дуушад хабаадаа. Тодорхойлбол, үлеэдэг хүгжэмэй зэбсэгүүдэй оркестр, арадай хүгжэмэй ба хатарай «Забава» театр, хатарай бүлгэмүүд, «Лэйкерс» хамталиг болон бусад энэ удар сугларагшадые хужарлуулаа. Тиихэдэ митингда хабаадагшадта мастер-классууд эмхидхэгдээ. Үхибүүд ба томошуул элдэб янзын конкурснуудта оролсоо, шагай наадаа.