Буряад Уласай ажаһуугшадые «Алас Дурна - уршагта ябадалнуудай орон» гэһэн мүрысөөндэ хабаадахыень урина

2025 оной майн 1-һээ бүхэроссиин «Алас Дурна - уршагта ябадалнуудай орон» гэжэ III мүрысөөндэ мэдүүлгэнүүдые абажа эхилбэ. Алас Дурнын тойрогоор ба Арктикаар аяншалга тухай эрхим видео-буулгабариин гол шан – 3 сая түхэриг.

- «Алас Дурна – уршагта ябадалнуудай орон» гэһэн мүрысөөн олондо һайшаагдаа. Конкурсын 1-дэхи хаһатай сасуулбал, 2-дохи хаһада гурба дахин олон хүн хабаадаа. Хэмжээ ябуулгада оролсохо дуратайшуулай тоо дээшэлхэ гэжэ батаар этигэнэб, юундэб гэхэдэ, аяншалха дуратай зон олон. Эдэбхитэйгээр аяншалдаг зон мүнөө  түрэл орондоо анхаралаа хандуулна.  Росси дотор Алас Дурнатай сасуулха газар олохонь бэрхэтэй. Би амаралтынгаа үедэ ходо аяншалдагби, гэр бүлэтэеэ ой модо руу ошодогби. Байгаалиин энгэртэ амарха ехэ дуратайбди, - гэжэ Оросой Холбоото Уласай Засагай газарай Түрүүлэгшын орлогшо - Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ Юрий Трутнев хэлэбэ.

Мүрысөөндэ хабаадахын тула Алас Дурнаар ба Арктикаар аяншалга тухай 8 минутын богонихон фильм буулгажа, 2026 оной январиин 15 болотор путешественникдв.рф сайт руу эльгээхэ хэрэгтэй.

Мүрысөөн хэдэн шэглэлтэй: ябагаар аяншалга (ябагаар газар үзэлгэ, зэрлиг байгааляар веломаршрут гэхэ мэтэ), уһан дээгүүр аяншалга (голоор уруудалга, далайгаар, уһан доогуур аяншалга, серфинг), үбэлэй сагта аяншалга (санаар газар үзэлгэ, нохой хүллөөд аяншалга, үбэлэй веломаршрут, сноубординг), тиихэдэ Арктикаар аяншалга тухай шэнэ янза.

Эрхим видео-буулгабариин гол шан – 3 сая түхэриг. Мүрысөөнэй шэглэлэй нэгэндэ илалта туйлаһанай түлөө нэгэ сая түхэриг шан байха, 2-дохи һуурида 300000 түхэриг, 3-дахи һуурида 100000 түхэриг  барюулагдаха.

Хабаадагшадай видео-аяншалгануудые мэргэжэлтэ шүүгшэд сэгнэхэ. Мүрысөөндэ бүхы үхибүүд (ехэшүүлэй ударидалга доро), бүдүүн зон (наһанай хизаарлалта үгы)  хабаадаха аргатай.

1-дэхи ба 2-дохи хаһануудые хаража үзэбэл, конкурс мэргэжэлтэ аяншалагшадай, мүн эдэбхитэйгээр амардаг зоной дунда ехэ эрилтэтэй. 2025 оной март һарада «Россия» гэжэ үндэһэтэнэй түбтэ 2-дохи хаһын дүнгүүд согсологдоо. 664 захяа конкурсда ороһон байна, тэрэ тоодо Буряад оронһоо. Илагшадай, түгэсхэлэй шатада ороһон хүдэлмэринүүд нютаг можын теле-субагуудаар дамжуулагдана, холбоото уласай хэмжээндэ харуулагдахаар түсэблэгдөө.

Үнгэрэгшэ хаһада Буряад ороноор аяншалга тухай гурбан фильм конкурсын элдэб янзануудта шанда хүртэһэн байна. Никита Булановай «Вдоль таежной, озерной, степной» гэһэн ролик «Ябагаар аяншалга» янзада 2-дохи һуури эзэлээ. Үбэлэй сагта аяншалга тухай фильмнүүдэй хоорондо Буда Цыдыпов ба Элихан Батоцыренов гэгшэд 2-дохи ба 3-дахи һууринуудта гараа.

Конкурс Алас Дурнын тойрогоор Оросой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай үүсхэлээр үнгэргэгдэнэ. Алас Дурнын тойрогоор Оросой Холбоото Уласай Юрэнхылэгшын бүрин эрхэтэ түлөөлэгшын аппарат, Россиин Зүүн зүгые хүгжөөлгын яаман, Алас Дурна ба Арктика хүгжөөлгын Корпораци, Ниигэмэй үүсхэлнүүдые хүгжөөлгын жаса хэмжээ ябуулга дэмжэнэ.