620
Мүнөөдэр, мартын 19-дэ, үнгэргэгдэһэн Буряад Уласай Засагай газарай суглаанда болбосоролой болон эрдэм ухаанай сайд Баир Жалсанов хүүгэдэй сэсэрлигүүдтэ орохо ээлжээ бага болгохо талаар хэгдэһэн ажал тухай хэлэбэ.
2018 ондо хүүгэдэй сэсэрлигэй ээлжээндэ уласай 12,4 мянган үхибүүд байгаа һаа, мүнөө 2021 оной февралиин 1-эй баримтаар 6,1 мянгаар багаа болоо. 2021 оной дүүрэтэр хүүгэдэй сэсэрлигүүдтэ 2,8 мянган һууринууд байгуулагдаха. Тиихэдэ ээлжээндэ 3,3 мянган үхибүүд үлэхэ.
Хүүгэдэй сэсэрлигүүд «Демография» гэһэн үндэһэн түсэлэй, «Болбосорол хүгжөөлгэ» гэһэн гүрэнэй программын хэмжээндэ болон Ородой Холбоото Уласай Юрэнхылэгшын даабаряар баригдана. Тиихэдэ хүүгэдэй хубиин сэсэрэлигүүдтэ гүрэнэй тэдхэмжэ үзүүлэгдэнэ.
- Хүүгэдэй хубиин болог гүрэнэй сэсэрлигүүдтэ түлбэри адли болгоһоной ашаар, хубиин сэсэрлигүүдтэ ябаха дуратайшуулай тоо олошороо, - гэжэ сайд хэлэбэ.
2018 онһоо 2019 он болотор хүүгэдэй 14 сэсэрлиг баригдаа, хүүгэдэй хубиин 71 сэсэрлиг байгуулагдаа. 2020 ондоо табан сэсэрлиг баригдаа, хубиин 79 сэсэрлиг нээгдээ.
2018 онһоо 2021 он болотор бүхыдөө Буряад Уласта 6,6 мянган һууритай хүүгэдэй 27 сэсэрлиг баригдаха: уласай аймагуудта – 8, Улаан-Үдэдэ – 19. Мүнөө хүүгэдэй 19 сэсэрлиг ашаглалгада тушаагдаа: 14-иинь – Улаан-Үдэдэ, 5-иинь – аймагуудта.
Буряад Уласай Толгойлогшо хүүгэдэй сэсэрлигүүдтэ үшөө һууринуудые байгуулха хэрэгтэ федеральна засаг зургаантай зүбшэн хэлсэхэ ажалаа эршэдүүлхэ гэжэ даалгаа.
Фото: pixabay.com
