775
- Мүнөөдэр шэдитэ һайхан Түнхэн дайдада оршодог Хэрэнэй дасанай шэрээтын сэнхиидэ Гомпел Абгалдаев заларба. Гайхалтай тэнюун, болбосорһон лама юм, - гэжэ Ородой буддын шажантанай тэргүүлэгшэ тэмдэглээ.
Тэрэнэй урда Хэрэнэй «Гандан Даржаалинг» дасанай шэрээтэ байһан Лубсан-Еши лама (Александр Амбаев) энэ хабар Энэдхэг орондо наһанһаа нүгшөө һэн. Далай ламын номдо хүртэхэ гэжэ һүзэгтэнтэй хамта Дхарамсала хото ошоод байтараа, 2023 оной апрелиин 1-дэ наһа бараһан байна.
Ивалгын дасанай лама байһанаа, Хэрэнэй дасанай шэрээтэ болоһон Гомпел Абгалдаевай сэнхиидэ заларха ябадал баярай оршон байдалда үнгэрбэ.
- Ородой Буддын шажантанай заншалта Сангхын Дид-хамба лама Дагба Очировай хүтэлбэри доро хурал хурагдаа. Тэрээндэ Ивалгын дасанай шэрээтэ Аюр Цырендылыков, ахалагша унзад лама Аюша Мункуев, шогомба лама Дамба Мункуев гэгшэд хабаадалсаа, - гэжэ Ивалгын дасанда мэдээсэбэ.
Фото: Ивалгын дасанай хэблэлэй албан
