«Булжамуур дууша биитнай»

Түнхэнэй аймагай түбэй номой сангай мэргэжэлтэд Цыретор Зарбуев тухай номой үзэсхэлэн дэлгэжэ, олон тоото сугларагшадые баярлуулһан байна.

- Цыретор Дугарович оройдоол 21 наһатайдаа Эсэгэ ороноо хамгаалгын Агууехэ дайнда баатарлиг үхэлөөр унаһан юм. Хэды тиигэбэшье, бүгэдэ Буряадай соёлдо өөрын ехэ мүр сараа үлөөһэн байна. 1940 ондо Москва хотодо эмхидхэгдэһэн Буряад соёл урлалай болон уран зохёолой түрүүшын декадада хабаадаһан намтартай. Уран зохёолшын «Буряад-Монгол оромнай» гэһэн шүлэгынь нэрыень мүнхэлөө гэхэдэ, алдуу болохогүй. Юуб гэхэдэ, композитор Гавриил Дадуев үгэнүүдтэнь хүгжэм найруулжа, суутай дуун болгоһон юм. 1960-аад онуудаар энэ дуун Буряадай радиогой дуудалгын дохёо болонхой. Эдэ бүгэдэ мэдээнүүдые үзэсхэлэн дээрээ суглуулаабди. Мүн шүлэгүүдтэйнь хүнүүд танилсаха аргатай. Һүүлдэнь Хэрэндэ, манай номой санда энэ үзэсхэлэн дэлгэгдэхэ, - гэжэ Түнхэнэй аймагай номой сангые даагша Эржена Ардуева хөөрэнэ.

Цыретор Зарбуев Мүнхэ Һарьдагай нэрэмжэтэ уран зохёолой нэгэдэлэй түрүүшын гэшүүдэй нэгэн байһан юм. Мүнөө жэлдэ байгуулагдаһаар 90 жэлэйнгээ ой тэмдэглэжэ байһан нэгэдэл иимэ хэмжээ ябуулгануудые 2026 ондо элбэгээр эмхидхэнэ гээд хэлэлтэй. Энэшье удаа мүнөө үеын гэшүүд, уран зохёолшод Шанай ерэжэ, энэ хэмжээ ябуулгада хабаадаба гээшэ. Дашима Гылыковна Дамдинова, Саяна Владимировна Хусаева, Людмила Владимировна Жалсанова, Владимир Лопсонович Убашеев гэгшэд дурсалгын һайхан үгэнүүдые хэлэжэ, өөһэдынгөө бүтээлнүүдтэй сугларагшадые танилсуулаа. Хизаар ороноо шэнжэлэгшэ Любовь Ермакова уран зохёолшо Цыретор Зарбуев тухай һонирхолтой хөөрөө дэлгээ.

Дулаахан хэмжээ ябуулгын гол үйлэ хэрэг гэхэдэ, Цыретор Зарбуевта зорюулагдаһан дурасхаалай самбарай нээлгэн болоо. Шанай һууринай соёлой байшанай дэргэдэ самбар үлгэгдэжэ, манай нютагта иимэ бэлигтэй хүн, уран зохёолшо, баатар сэрэгшэ ажаһуугаа юм гэжэ нютагай хүнүүдтэ һануулжа байха зэргэтэй юм.

Тус хэмжээ ябуулгада Цыретор Дугаровичай түрэл гаралнууд хабаадаба. Юрий Содномович Балханов, Хорла Цыденовна Молокшонова гэгшэд эмхидхэгшэдтэ, нютагаархиндаа баяраа мэдүүлээ.

Түнхэнэй аймагай түбэй номой сангай гэрэл зурагууд.