«Үетэн» бүлгэмэй мүндэлһөөр 50 жэлэй ойе угтуулан

1976 онһоо хэбэд номхон Хэжэнгэ нютагтаа ВСГИК дүүргэһэнэй һүүлдэ би соёлой таһагта инспекторээр, нэгэ хэды болоод, арадайнгаа театрай режиссёроор ажаллааб, хожомынь ВЛКСМэй райкомой секретаряар һунгагдаа бэлэйб. Харин тэрэ үедэ Улаан-Үдын хүгжэмэй училищида Светлана Намсараевна Намжилон һуража гараһанай удаа “Ургы” гэһэн Хэжэнгынгээ арадай хоорой хормейстерээр амжалтатай хүдэлжэ эхилээ һэн.

Түрүүн соёлоймнай таһагай бэлиг талаантай дарга Лидия Васильевна Лоскутникова байгаа, удаань ехэ шударгы бэрхэ Валерий Доржиевич Данзанов соёлой таһагые даагша боложо, соёл-гэгээрэлэймнай ажалые һэргээгээ, залуу зоной ажаһууха гоё хамтын байра баряа. Тэрэ үеын “Залуу наһан” (“Молодость”) ансамбльтаяа Шэнэ Хэжэнгын дайшалхы сэрэгшэдэй аялга хүгжэмэй бүлгэмтэй хамтаржа, сугтаа репетици хэжэ, Улаан-Үдэдөө ВИА-нуудай республиканска 1-дэхи конкурсын лауреадууд болоһон байнабди.

Бүри уридшалан дуунай-инструментальна ансамбльтаяа түрэл нютагтаа олон тоото тоосоото, тэрэ тоодо агитбригадынгаа тоглолтонуудта, “Ургы” хооройнгоо ойн баярай, мүн тиихэдэ Шэнэ жэлэй найр наадануудта, заншалта һайндэрнүүдэй, комсомолшуудай болон багшанарай конференцинүүдтэ, комсомолой болон бэшэшье түрэнүүдтэ заабол хабаадагша бэлэйбди. Баяан дээрэ наададаг хүгжэмэй багша Виктор Иванович Аносов, аха дүү Пётр, Егор Салисовууд, һургуулида һурадаг байһан Жамсик Тумунов, Саша Базаров, Баир Шойдоков, һүүлдэнь минии дүү басагантай суг һураһан Боря Данзанов, Загаһатада байдаг Эрдэни Батсух, Газманов гүүлүүлдэг Митыпов, бусад залуушуул ВИА-да ороо һэн. Ехэ бэрхээр хатардаг, дууладаг байһан, нэгэ жэлэй туршада Хэжэнгэдэмнай хүдэлһэн, мүнөө үедэ “Байгал” театрай уран һайханай хүтэлбэрилэгшэ, олондо мэдээжэ артист Дандар Жапович Бадлуев уран бэлигээрээ тоглолтонуудыемнай шэмэглэдэг байгаа бшуу.

Нэгэтэ репетици соёлойнгоо байшанда (директорынь - Оросой соёлой габьяата хүдэлмэрилэгшэ Пылма Цыреновна Доржиева байгаа) хэжэ байтарнай, нютагаймнай фотографида хүдэлдэг Борис Генинов орожо ерээд: “Юун ута нэрэтэй гээшэб ансамбльтнай, угайдхадаа «Залуу наһан” (“Молодость”) хоёр нэрэтэй, буряадаар мэдээсэл (афиша) бэшэхэдэшни, һаалта болоно, “Үетэн” гэжэ нэрлыт”, - гэһэн дурадхал оруулаа бэлэй. Тэрэ гэһэнһээ хойшо “Үетэн” гэһэн нэрэнь (дуунуудые зохёогшо, хүтэлбэрилэгшэнь, Оросой соёлой габьяата хүдэлмэрилэгшэ Баир Нимаевич Шойдоков) суутай боложо, бүхы уластаа концерт-наадаараа мэдээжэ болоо һэн.

Буряад Уласай Гүрэнэй шангай лауреат, габьяата нэрэтэй болоһон үетэнэйхид алтан ойгоо байгша оной декабрь һарада тэмдэглэхэеэ бэлдэжэ байна. Табин жэл соо талаан бэлигээ шагнагшад, харагшадтаа харуулжа, баярлуулжа, бахархуулжа байдаг энэ дуунай бүлгэмдэ зохёохы амжалта, зол жаргал, бүхы дэлхэйн һайн һайханиие хүсэнэбди: “Хэжэнгын хүбүүд, басагад, хэтын замдаа дуутай, шуутай, элүүр энхэ, эбтэй эетэй ябахатнай болтогой!”