Буряад Уласай Хяагтын аймагай Наушки тосхондо хүүгэдэй сэсэрлиг нээгдэбэ

«Үльгэр» гэһэн хүүгэдэй сэсэрлигэй 150 һууритай байшан Буряад Уласай Засагай газарай, «РЖД»-н  ба аймагай захиргаанай хоорондо баталагдаһан хэлсээнэй хэмжээндэ баригдаба. Барилгада 223 сая түхэриг һомологдоо.

- Энэ шэнэ, мүнөө сагай эрилтэдэ таараһан байшанай нээлгэ тосхоной, бүхы аймагай ниигэмэй ба экономикын талаар хүгжэлтэдэ нүлөөлхэ. Һаяхана бидэ хэлсээ баталжа, түмэр харгын тамуужанай логистическа терминал барижа эхилбэбди. Эдэ түсэлнүүд хоорондоо холбоотой, ажалай шэнэ һууринууд байгуулагдаха. Сэсэрлигэй шэнэ байшан соо үхибүүдэй энеэдэн ходо зэдэлжэ байхань болтогой, - гэжэ Хяагтын аймагай толгойлогшо Андрей Фомин хэлэбэ.

3000 хоёролжон метрэй талмайтай байшан соо үхибүүдэй зургаан бүлгэм, эмнэлгын ба процедурна кабинедүүд, хүгжэмэй ба тамирай заалнууд байха. Хүүгэдэй сэсэрлигтэ хизаарлагдамал арга боломжотой зоной оршон байгуулагдаа, тусхай жорлонгууд, пандусууд ба лифт эндэ бии. Сэсэрлигэй 22 хүмүүжүүлэгшэд 150 үхибүүнтэй хүдэлхэ. Буряад Уласай Засагай газарай, «РЖД»-н  ба аймагай захиргаанай хоорондо баталагдаһан хэлсээнэй ёһоор сэсэрлигэй байшанай барилга мүнгэн зөөрёор хангагдаа.

- Буряад Уласай дэбисхэртэ ниигэмэй удха шанартай хэмжээ ябуулгануудые бэелүүлхэ хэрэгтэ бидэ оролсожо, туһа үзүүлжэ байдагбди. Һүүлэй гурбан жэлэй туршада Наушки тосхондо баригдаһан хүүгэдэй сэсэрлигэй хажуугаар буян үйлэдэлгын 70 гаран хэлсээн баталагдаһан байна. Харин һомологдоһон мүнгэн зөөриин хэмжээн 330 саяһаа дээшэ гараа, - гэжэ Зүүн Сибириин түмэр харгын даргын Улаан-Үдэ хотоор орлогшо Эдуард Янченко тэмдэглэбэ.

Үхибүүдэй сэсэрлигэй байшан дулаагаар, уһаар, зайн галаар хангагданхай, түймэрһөө һэргылэлгын системэтэй. Байшанай оршон тойронхи газар болбосон түхэлтэй болгогдоо.

- Сэсэрлигэй нээгдэхые удаан хүлеэгээбди. Одоол мүнөө барилга дүүрэбэ. Нэн түрүүн үхибүүдэй түлөө баярланаб. Байшан дотор шэнэ эд бараан, нааданхайнууд, түхеэрэлгэнүүд табигдаа, үшөө олон үхибүүд манда ерэхэ, - гэжэ сэсэрлигэй даагша Любовь Игнатьева хубаалдаба.