«Алас Дурна - уршагта ябадалнуудай орон» мүрысөөнэй шангай жаса нэмэгдэбэ

2025 оной майн 1-һээ 2026 оной январиин 15 болотор бүхэроссиин «Алас Дурна - уршагта ябадалнуудай орон» гэжэ III мүрысөөндэ мэдүүлгэнүүд абтаха.  Хэмжээ ябуулга 2022 ондо үнгэргэгдэһэн Зүүн зүгэй экономическа хуралдаан дээрэ Алас Дурнын тойрогоор Оросой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай үүсхэлээр эхи абаһан юм. Эмхидхэгшэд конкурсын хоёр хаһын дүнгүүдые согсолжо, дүримдэнь зарим һэлгэлтэнүүдые  оруулба.

Мүрысөөндэ хабаадаха можо нютагууд олон болобо

Мүнөө Алас Дурнын тойрогоор аяншалга тухай хүдэлмэринүүдэй хажуугаар Россиин Арктическа зоноор аяншалгануууд хабаадаха эрхэдэ хүртэбэ. Алас Дурнын тойрогой 11 нютаг можодо Мурманскын ба Архангельскын можонууд, Карели ба Коми Улас, Ненецкэ, Ямало-Ненецкэ ба Ханты-Мансийска бэеэ дааһан тойрогууд, Красноярска хизаар нэмэгдэбэ. Оросой Холбоото Уласай Арктикын нэгэ гү, али хэдэн дэбисхэрээр уһан дээгүүр, ябагаар, үбэлэй сагта аяншалһан тухай фильмнүүд хабаадаха эрхэтэй.

Шангай жаса нэмэгдэбэ

«Арктикаар аяншалга» гэжэ шэглэлэй нэмэгдэһэн ушараар мүрысөөнэй шангай жаса ехэ болобо. Шэнэ номинацида илагша 1 сая түхэригөөр шагнагдаха, 2-дохи һуурида гараһан аяншалагша 300 000, 3-дахи һуури эзэлэгшэ 100 000 түхэригэй шан абаха.

Хизааргүй эдэбхи үүсхэл

Мүрысөөн хэдэн шэглэлтэй: ябагаар аяншалга (ябагаар газар үзэлгэ, зэрлиг байгааляар веломаршрут гэхэ мэтэ), уһан дээгүүр аяншалга (голоор уруудалга, далайгаар, уһан доогуур аяншалга, сёрфинг), үбэлэй сагта аяншалга (санаар газар үзэлгэ, нохой хүллөөд аяншалга, үбэлэй веломаршрут, сноубординг).

Хабаадагша аяншалгын ямаршье арга шэлэжэ абаха аргатай, гансал моторно техникээр ябажа болохогүй.

Онсо ушаралтай байдалай талаар яаманда ганса орёо зам тухай мэдээсэхэ

Мүрысөөндэ хабаадахын тула аяншалгада гараха тухай МЧС руу урид дуулгадаг байгаа. Харин шэнэ хаһада ажамидаралда, бэеын энхэ элүүртэ аюултай, орёо зам гаталха зон МЧС-тэ мэдээсэл эльгээхэ ёһотой болоно. Россиин МЧС-эй 2023 оной мартын 29-дэ гараһан 270-дахи зарлиг соо аяншалгада гараха тухай мэдээсэлэй эмхи журам тодорхойлогдонхой.