Улаан-Үдэдэ хотын мастер-түсэбэй хэмжээндэ «Алас Дурнын кварталай» барилга эхилбэ

Апрелиин 25-да Оросой Холбоото Уласай Алас Дурна ба Арктика хүгжөөлгын сайд Алексей Чекунков, Буряад Уласай Толгойлогшо Алексей Цыденов, Улаан-Үдэ хотын мэр Игорь Шутенков, нютаг можын девелопментын “ПИК” компаниин захиралай орлогшо Владимир Антонов гэгшэд Улаан-Үдэдэ Алас Дурнын кварталай барилгын эхи табиба.

 «Улаан Хото» комплекс Буряад ороной ниислэлэй мастер-түсэбэй гол элементнүүдэй нэгэн болоно. Россиин Юрэнхылэгшэ тус мастер-түсэб дэмжэһэн байна. Барилга 2033 ондо дүүргэхээр түсэблэгдөө.

 Түсэл бэелүүлхын тула Россиин Засагай газарай тогтоолоор «Бурятия» гэжэ урид хүгжөөлгын дэбисхэрэй хилэ үргэдхэгдэһэн байна. Һаяын сагта барилгын “ПИК” компани Алас Дурна ба Арктика хүгжөөлгын Корпорацитай баталһан хэлсээнэй ёһоор урид хүгжөөлгын дэбисхэрэй резидентын зэргэтэй болохо.

Улаан-Үдэ хотын түбтэ 200 мянган хоёролжон метрэй талмайда дүн хамта 13 гэр, хүүгэдэй 2 сэсэрлиг, мүнөө сагай эрилтэдэ таарама һургуули, поликлиникэ, «Байгал» театрай, Үндэһэтэнэй музейн байшангууд, ехэ һургуулинууд хоорондын болбосоролой кампус баригдаха.

Оросой Холбоото Уласай Алас Дурна ба Арктика хүгжөөлгын сайд Алексей Чекунков Буряад Уласай ажаһуугшадые үргэн дэлисэтэй түсэлэй бэелүүлэгдэжэ эхилһээр амаршалба.

- Улаан-Үдын мастер-түсэб Россиин Юрэнхылэгшэ дэмжээ. Бүхы хэрэгтэй шиидхэбэринүүдые Засагай газар абаа, тиихэдэ хото хүгжөөлгын нэгэдэмэл түсэб баталагдаа. Жэшээ бэлэдхэлэй ёһоор болбосон түхэлтэй дэбисхэр байгуулагдаха, хото гоё болохо, ажаһуугшадай байдал шанартай болохо, үхибүүдтэ, залуушуулда тааруу зохид оршон байгуулагдаха. Һанаһан юумэеэ бүтээхын түлөө бүхы хүсэ шадалаа гаргахабди, - гэжэ сайд хэлэбэ.

Буряад Уласай Толгойлогшын тэмдэглэһээр, мастер-түсэб бэлдэлгын үедэ Россиин Юрэнхылэгшэ Владимир Путин Улаан-Үдэ ерэжэ, түсэлэй бүхы дурадхалнуудтай танилсаа һэн.

- Юрэнхылэгшын сэхэ даабаряар олон шиидхэбэринүүд абтаа. Юрэнхылэгшэ Улаан-Үдэ ерэжэ, эндэ манай мастер-түсэб баталаа. Юрий Петрович Трутневай, Алексей Олегович Чекунковой дэмжэлгээр, Алас Дурна ба Арктика хүгжөөлгын яаманай мүнгэн зөөрёор ажаһуугшадые хуушарһан гэрнүүдһээ зөөлгэнэбди. Хүн зон тааруу зохид шэнэ гэр байратай болоно. Харин хуушан гэрнүүдэй һуурида шэнэ  корпусууд бодожо, хотын түб гоё һайхан болохо. Гэрнүүдэй 1-дэхи дабхарта ресторанууд, элдэб мастерскойнууд, шэные үүсхэһэн үйлэдбэринүүд, СПА гэхэ мэтэ бии болохо. Хүндэтэ нютагайхид, хүндэтэ ажаһуугшад, ажалаа ябуулхабди, дүнгүүд баярлуулха, - гэжэ Алексей Цыденов хэлэбэ.

Нютаг можын девелопментын “ПИК” компаниин захиралай орлогшо Владимир Антонов: «Улаан Хото» гэжэ түсэл манда онсо удха шанартай. Эндэ ганса зоной байха комплекс бэшэ, энэ хадаа Буряад Уласай түүхэ ба соёл хүндэлэн байгуулһан хотын оршоной шэнэ шанарай һүлдэ тэмдэг. Улаан-Үдын түбтэ ажаһуугшадай байха тааруу зохид гэрнүүд бодохо, архитектурын ба болбосон түхэлтэй болголгын зүйлнүүдтэ, олониитын уужамда онсо анхарал хандуулагдаха. «Улаан Хото» зубшаад сэнгэлгын бульвар татагдаха, тэрэ Үндэһэтэнэй музей ба «Байгал» театр холбохо. Эдэ объектнүүд үндэһэтэнэй маягаар баригдажа, Буряад ороной баян соёл харуулһан архитектурна зүйлнүүдээр шэмэглэгдэхэ. 

Алас Дурнын кварталай дэбисхэр дээрэ залуушуулай ба һурагшадай «Кванториум» гэжэ шэнэлэгдэһэн  технопарк нээгдэхэ. Технопарк талаан бэлигтэй эдиршүүлэй түб болохо.

Россиин Зүүн зүгые хүгжөөлгын яаман, Алас Дурна ба Арктика хүгжөөлгын Корпораци, нютаг можын засагай газар, “ПИК” компани түсэл бэелүүлгэ хангаха талаар шухала хэмжээ ябуулгануудые үнгэргөө.

Улаан-Үдэдэ Алас Дурнын квартал барилгын үедэ соёлой уг залгамжын баялигай 13 объект һэльбэн шэнэлэгдэхэ, хотын түбтэ оршодог урданай модон гэрнүүд һэргээгдэхэ. Түһөө түсэб байгуулхадаа, барилгашад ганса соёлой бэшэ, харин уларилай, газарай онсо өөрсэ зүйлнүүдые хараадаа абаа. Бүхы байшангууд бүхэ фундамент дээрэ баригдаха, 9 балл газарай хүдэлэлгэ дааха найдамтай армагтай байха.