Суута эрдэмтэниие дурсаа

Дамнин Шагдурович Фролов Түнхэнэй аймагай Шанай һууринда түрэһэн намтартай. Түрэл нютагайнь арад зон суута хүбүүнэйнгээ дурасхаал нангинаар сахина. Тиигэжэ Зүүн-Мүрэнэй дунда һургуулиин дэргэдэ олон тоото хэмжээ ябуулганууд эмхидхэгдээ.

Апрелиин 26-да гол хэмжээнүүд болоһон бай­на. Олон хүндэтэ айлшад ерэжэ, энэ баярые хубаал­даа. Буряадай түрүү дээдэ һургуулинуудай хүтэлбэрилэгшэд: Игорь Геннадьевич Сизов (ВСГУТУ), Елена Юрьевна Перова (ВСГИК), Арадай Хуралай һунгамалнууд, Түнхэнэй аймагай за­хиргаанай мэргэжэлтэд, “Са­яны” гэһэн Түнхэнһөө уг гарбалтайшуулай эблэлэй гэшүүд болон бусад ойн бая­рай хэмжээндэ хабаадаа.

Энэ үдэр Зүүн-Мүрэнэй дунда һургуулиин түүхын - хизаар ороноо шэнжэлэлгын музейн дэргэдэ Дамнин Фроловой хүшөө нээгдэбэ. Залуу уран гартан Егор Дармаев хүшөө зохёон бүтээгээ. Апрелиин 22-то ВСГУТУ-гай газаа нээгдэһэн хүшөө баһа Егор хэһэн байна.

- Егор Дармаев хадаа залуу мэргэжэлтэн, ерээдүйн бэлигтэй скульптор юм. Ивалгын хүүгэдэй урлалай һургуулида һураа. Пётр Чайковскиин нэрэмжэтэ хүгжэмэй колледж шадамар бэрхээр дүүргээд, Красноярск хотодо һуралсалаа үргэлжэлүүлээ. Хворостовскиин нэрэмжэтэ Красноярскын соёл урлалай дээдэ һургуулида һураһан намтартай. Манай колледж дүүргэһэн бэлигтэй дархан Буряад Уласай стипенди абадаг, Соёлой яаманай дэргэдэхи залуушуулай эблэлэй гэшүүн юм. Агада нээгдэһэн эб найрамдалай хүшөө бодхоолгодо хабаадалсаа. Будда бурханай дүрсэ Ивалгын дасанай шэнэ Согшон дуганда бэлдэһэн байна. Дамнин Шагдурович Фроловой хоёр хүшөө тон адляар хэжэ шадаа гэжэ түрэл гаралынь мэдүүлнэ, - гэжэ Пётр Чайковскиин нэрэмжэтэ хүгжэмэй колледжын захирал Баир Турбянов хөөрэбэ.

100 жэлэй ойн баярай үедэ Зүүн-Мүрэнэй дунда һургуулида хүүгэдэй үүсхэлнүүдэй түб ажалаа ябуулжа эхилээ. “Движение первых” нэгэдэлэй эдэбхитэй һурагша Арюунзая Дарбакова улаан лентэ хайшалжа, энэ үйлэ хэрэг нээһэн байна. Энэ ушараар һургуулиин мэдээсэлэй түб һургуулиин телевидени байгуулжа, түрүүшынгээ программа харуулаа. Хүндэтэ айлшаар ВСГУТУ-гай ректор Игорь Сизов буужа, 9-дэхи классай һурагша Солбон Мантуровай асуудалнуудта харюусаа. Удаань һурагшадай болон багшанарай хүсөөр баяр ёһололой тоглолто болоһон байна.

- Ехэ гоё концерт-наадан сугларагшадта дурадхагдаа. Зоригма Валерьев­на Мантурова захирал, зүблэгшэнь Эржена Алек­сандровна Шобоева тус хэмжээ ябуулга үнгэргэхын түлөө тон ехэ ажал ябуулһан байна. Энэ ойн баярта нэгэ бага хабаатайб гээд һанагдана. Юуб гэхэдэ, эр­дэмтэн, уран зохёолшо Алла Дамниновна Эрдынееватай хамта Зүүн-Мүрэн һуурин тухай дуу зохёоһон байнаб­ди. Энэ дуун нютагай түрын дуулал болошоһондонь ба­яртайб. “Дээдэ һургуули байгуулһан Дамнин Шагду­рович ударидагша! Соло­то нэрэнь мүнхэрэг! Суута хэрэгынь алдаршаг!” гэһэн һайхан үгэнүүд дуун соо оронхой, - гэжэ дуушан, “Са­яны” гэһэн Түнхэнһөө уг гар­балтайшуулай эблэлэй эдэб­хитэй гэшүүн Вера Шобосо­ева хөөрэнэ.

Үнэхөөрөө, Зүүн-Мүрэнэй һургуулиин багшанар, үхибүүд нютагайнгаа суута эрдэмтэн, Эсэгэ ороноо хамгаалгын Агууехэ дайнай ве­теран Дамнин Фроловой 100 жэлэй ойн баярые үргэн дэ­лисэтэйгээр эмхидхээ.

- Тус ойн баярта үнинэй бэлдэжэ эхилээбди. Ма­най һургуулиин шуран шу­даргы, урагшаа һанаатай зүблэгшэ Эржена Алексан­дровна Шобоева бүхы хэм­жээ ябуулгануудые үндэр хэмжээндэ бүтээжэ шадаа. Һургуулиимнай дэргэдэ һуралсалай жэлэй эхинһээ абаад, Дамнин Шагдуровичта зорюулагдаһан һонирхолтой хэмжээнүүд зорюу­лагдаа, - гэжэ һургуулиин за­хирал Зоригма Валерьевна Мантурова мэдүүлнэ.

Зүүн-Мүрэнэй һургуулиин дэргэдэ үнгэргэгдэһэн эрдэм шэнжэлэлгын кон­ференцидэ, уранаар ун­шалгын урилдаанда, эхин классай үхибүүдэй дун­да олимпиадада, волейболоор, мэргэн буудалгаар мүрысөөнүүдтэ Түнхэнэй аймагай һурагшад хабаадалсаһан байна.