​Буряад Уласай Хэжэнгын аймагта заһабарилгын ажал ябуулагдана

Апрелиин 30-да Буряад Уласай Толгойлогшо Алексей Цыденов Хэжэнгэ һууринай заһабарилагдажа байһан объектнүүдтэ хүрэбэ. Тодорхойлбол, заһабарилгын ажалнууд аймагай түбэй эмнэлгын газарта ба һургуули- интернадта эхилэнхэй.

Һургуули-интернадай заһабарилга холбоото уласай «Болбосоролой системэ һэльбэн шэнэлэлгэ» гэжэ программаар ябуулагдана. Эндэ байшанай орой, сонхонууд, дулаасуулгын хэрэгсэлнүүд һэлгэгдэхэ, газаа ба зосоо талань шэнээр хэгдэхэ болоно. Хэжэнгын һургуули-интернат үнгэрэгшэ зуун жэлэй 60-аад онуудта баригдаһан юм. 1990 ондо болбосоролой яаманай зууршалгаар «Үндэһэтэнэй буряад һургуули» гэһэн жэшээгээр туршалгын талмай болоһон байна. Туршалгын түрүүшын 5 жэлэй туршада һуралсалай ба материальна бааза байгуулагдаа һэн. Буряад Уласай аймагуудһаа, хүршэ Эрхүүгэй ба Шэтын можонуудһаа, Монгол гүрэнһөө, Дотор Монголһоо, Хитадһаа дүн хамта 49 делегаци дүй дүршэлөөр хубаалдахаяа Хэжэнгын һургуули- интернат руу ерэһэн байна. Тиихэдэ байгша ондо аймагай түбэй эмнэлгын газарай заһабарилга элүүрые хамгаалгын программаар үргэлжэлһээр. Ехэ заһабарилга 2025 оной эсэтэ дүүргэгдэхээр хараалагдана.

- Загарай-Хэжэнгэ шэглэлээр харгы заһабарилгын ажалнууд ябуулагдана. Эгээ һүүлдэ хэгдэһэн 27 километрэй зай ехэ хүндэ байгаа. Хэжэнгын аймагай дэбисхэр дээрэхи харгын  заһабарилгада 256 сая түхэриг шэглүүлэгдэхэ. Ажалнууд ябуулагдана, харгын заһабарилга дүүргэхэбди. Түсэблэгдэһэн юумэн бүтэнэ, арад зон хаража байна, - гэжэ Буряад Уласай Толгойлогшо тэмдэглэбэ.

Алексей Цыденов һууринай ажаһуугшадтай уулзаа. Уулзалгын дүнгөөр уласай толгойлогшо хэдэн даабаринуудые үгэбэ, тэрэ тоодо сэрэгэй тусхай үйлэ хэрэгүүдтэ хабаадагшадай хандалгануудые хиналта дороо абаа.

- Арад зон ондоо объектнүүдээр асуудалнуудые табина. Аймагай түбэй эмнэлгын газарай инфекционно таһаг заһабарилха тухай һурахаһаа гадна үхибүүдэй уран урлалай һургуулиин байшанай барилга тухай асуудал табяа. Тус һургуулиин байшан һандаржа эхилээд байна, тэрэниие «Хүдөөгэй дэбисхэрнүүдые хүгжөөлгэ» гэжэ программада оруулха талаар ажал хэхэбди. Тэмдэглэхэ зүйл гэхэдэ, Хэжэнгэ һуурин тулга болохо пунктнүүдэй бүридхэлдэ оруулагдаа. Россиин Юрэнхылэгшын зарлигаар, тус бүридхэлдэ ороһон һууринуудта ажабайдалай шанар 30 хубяар дээшэлүүлэгдэхэ ёһотой. Тиин хангамжын ажахынууд, харгынууд, дулаасуулгын объектнүүд, болбосорол, ниигэмэй һалбари, соёл, нэгэ үгөөр хэлэбэл, бүхы юумэнэй шанар һайжарха. Тиимэһээ ажаһуугшадай хүсэлнүүдые хараадаа абажа, ажалай түсэб байгуулнабди, - гэжэ Буряад Уласай Толгойлогшо хэлэбэ.