Манай зүрхэндэ хэтын хэтэдэ мүнхэ...

Эгээл һайханаар һанагдаха, хайрата манай дүү хүбүүн Солбоной дайсанай һомонһоо алдалан унаһаарнь хахад жэлһээ үлүү саг үнгэрбэшье, зүрхэнэй шарха эдэгэхээр бэшэл даа. «Танай хүбүүн, гвардиин сержант  Солбон Саянович Хонхушкин, Донецкэ Арадай Республикын харьяата газарта сэрэгэй даабари дүүргэжэ ябатараа, һураггүй үгы болоо!» - гэһэн сахилгаан бэшэг абахадаа, эхэ эсэгын зүрхэн ямараар сохюулааб? Тэрэ үдэрһөө хахад жэлэй дараа дүү хүбүүнэймнай бэе олдожо, нютагтань хүдөө табяа һэмди. Харин мүнөө гантиг шулуун дээрэ дүрэ зурагынь һиилэгдэжэ, дурасхаалай самбар бодхоогдобо.

Үхибүүн ябахадаа

 - Санжа нагсагша, танай тугалнууд һургуулиин хойно бэлшэжэ ябаа, туужа асарааб, - гэжэ 4-5 наһатай ябахадаа, хүршэ Дугар хүбүүнтэеэ үнеэдэй үдэшын һаам болохоһоо урид гүйлдэжэ ерэгшэ һэн.

Һургуулияа дүүргэжэ, Улаан-Үдэ хото ерэхэдэмни, манай дүү, бүлэ хүбүүмнай һургуулида ороогүй ябаал даа. Багахан байхадань, велосипедэй урда һуулгаад, хонидоо, тугалнуудаа эрьежэ ошогшо һэмди. «Тээ тэндэ манай тугалнууд бэлшэжэ ябана, наашань захадыш», - гэхэдэшни, түргэн гүйжэ ошоод, шадамар бэрхээр туужа асарха...  

Эгээл согтой наһандаа

Бурханай төөлэжэ табиһан бэе, тооложо үгэһэн наһаниинь иимэ богонихон байһаниинь харамтай даа. Солбон дүү хүбүүмнай дунда һургуулияа дүүргэһэнэй удаа дээдэ һургуулида һуража туршаад, уялгата албаяа дүүргэхэ гэжэ шиидэһэн байна. Болзорто албанайнгаа һүүлээр хэлсээ баталжа, хэдэн жэлэй туршада Хойто-Кавказай сэрэгэй тойрогто алба хааһан байна. «Түрэл нютагһаа холо ябахада хүндэхэн», - гээд, Үбэр Байгалай хизаарта оршоһон сэрэгэй часть шэлжэн ороһон юм. Эдирхэн наһандаа сэрэгэй хүн болоод, һүүлшынгээ үдэр хүрэтэр нэгэтэ үгэһэн тангаригаа эбдээгүй, үнэн сэхээр Эхэ орондоо алба хэһэн даа. Һургуулиин шаби байхаһаа тамирай талаар бэеэ шанга һорижо, амаргүй бэрхээр волейбол наададаг һэн. Дунда, дээдэ һургуулида һуража байхадаа, суглуулагдамал командын түрүү бэрхэ наадагша ябаа. Нютагайнгаа нэрэ хүндэ аймагай, уласай хэмжээндэ хамгаалжа наадагша бэлэй.

Дайнда

Украинада һүжэрһэн байлдаанай эхилхэтэй сасуу тиишээ эльгээгдэхэ болобо. Сэрэгэй хүн һэн хойноо тэрэнэй урда табигдаһан даабари дүүргэхэл ёһотой болоно ха юм. Дайн дажарай эхилһэн түрүүшын жэлдэ баруун тээшэ эльгээгдэжэ, дайшалхы нүхэдөөрөө ажалаа жэншэдгүй хэжэ ябаа.

 - Танай дүү хүбүүн амаргүй шанга зүрхэтэй, бүхэ голтой, һүбэлгэн ухаатай ахалагша ябаа. Шархатажа, шуһаяа адхаржа байгаашье һаа, дайсанай урда үбдэг дээрэ унаагүй, шадамар бэрхээр дахуулжа, ябаһан сэрэгшэдээ ударидаа, - гэжэ тэрэнэй ахалагша «Борода» гэжэ дуудалгатай сэрэгшэн нэгэтэ бэшэ хэлэһэн юм.

2024 оной зунай һүүл һарын 23. Нажарай үдэр дүүрэнтэжэ, тээ баруун-хойно зүгтэ наран орохоёо тэнгэриин хүбөө шара-улаан болоод байна. Солбон хүбүүнэй зосоо ехэ хүлгөөтэй. Сэрэгэй шанга һургуули гараха гэжэ туршалгын талмай ерэһэн сагһаань хойшо хоёр һара үнгэрөө. Энэ хоёр һарын хугасаада бэеэ шэрүүнэр абажа ябахаһаа эхилээд, сэрэгэй нюусануудтай танилсана. Байлдаанай урда захада ошожо, дайсанда добтолжо орохонь ойртобо даа. Солбоной ой ухаанда эжы абань, түрэһэн ахань, эгэшэнь, мүн зээ хүбүүд басагадынь ороно. Түрэл нютагайнь шарай элихэнээр нюдэндэнь зураглагдан харагдахал гэнэ.  Олон тоото аха эгэшэнэртэеэ бэшэлсэнэ. Дайнай халуун дүлэн руу орохоёо байһан сэрэгшэдэй зосоо ямархан байхаб даа?

- Дүү хүбүүмни, сайн байна! Албандаа хэр ябажа байнаш? – гэжэ бэшэжэ асуухадамни: «Гэмгүй даа, ажал хэрэг хуу һайн. Үглөөдэр урагшаа орохобди!». Тиихэдэнь би: «Зай, һайн ябаад, амиды мэндэ бусаарай даа!»  - гэжэ захяа һэм. Энэл даа һүүлшымнай зугаа. Үглөөдэрынь сэрэгэй даабари дүүргэхэеэ ошоһон дүү хүбүүмнай дайсанай табиһан үхэр буугай һомонһоо хосороо ха юм даа.   

Эгээл залуу, һайхан энэ наһандаа эхэ эсэгэеэ, аха дүүнэрээ орхижо, түрэлөө урилһандань хайратай даа. Эгээл дүтөөр һанагдаха, хайратай дүү хүбүүмнай түрэл гаралдаа эрьежэ түрэхэ бэзэ гэжэ найдаад, маани мэгзэмээ уншажа һуухабди даа. Нарай байхаһаань хойшо булта эрхэлүүлжэ, энхэржэ, таалан үндэжэ ябаһан дүү хүбүүмнай дахинаа харагдахагүй, уулзажа зугаалха аргагүйбди гэжэ һанахадаа, манай зосоо хара бууна.