Баатаршалгын һүлдэ тэмдэг

Эсэгэ ороноо хамгаалгын Агууехэ дайнда туйлагдаһан Агуу Илалтын 80 жэлэй ойдо зорюулагдаһан «Дурасхаалай сэсэр­лиг» гэһэн уласхоорондын заншал­та хэмжээ ябуулга мүнөө жэл майн 16-да Загарайн аймагта үнгэргэгдөө. Тус хэмжээ ябуулга 64 мянган нарһа ургуулха гэһэн һэдэлгэтэй 700 гаран хүниие нэгэдүүлээ.

Энэ хэмжээ ябуулгада Ойн ажахын Федеральна агентствын хүтэлбэрилэгшэ Иван Советников, Буряад ороной Толгойлогшо Алексей Цыденов, Арадай Хуралай хорооной түрүүлэгшэ Пётр Мордовской хабаадаа.

- Энэ хэрэгтэ ерэжэ, өөрөө модо һуулгаһан хүн хэзээдэшье ой соо бог шоройгоо хаяхагүй, түүдэг ун- тараангүй орхихогүй, хуули бусаар модо отолхогүй. Энэ дэмбэрэлтэ хэ­рэг ойдо һайн һайханаар, хайра гам­тайгаар хандалгые, дурлал түрүүлнэ. Энэ үйлэ хэрэгые тон ехээр дэмжэдэг Буряад Уласта ехэ баяртайб, хүн зо­ной иимэ олоороо ерэжэ, хабаадажа байһандань, бүри ехээр баярлабаб, - гэжэ Оросой Ойн ажахын һалбариин хүтэлбэрилэгшэ Иван Советников мэдүүлээ.

Энэ удаа Загарайн аймагай ойн ажахын дэбисхэр дээрэ Доодо Тайлса нютагһаа холо бэшэхэнэ нарһан мо­донуудай сагдуулханууд һуулгагдаа. Эндэ 2012 ондо ойн түймэр мушха­ран гараһан байна. Мүнөө 16 гектар талмайда ойе һэргээн бодхоохо хэ­рэг бүтээгдээ.

Урда жэлнүүдтэ уласайнгаа Онсо байдалай ба граждан оборонын та­лаар һалбариие хүтэлбэрилжэ ябаһандаа, түймэрэй ямар ехэ хохидол ушаруулдагые һайн мэдэхэ Пётр Мордовской ой модоёо һэргээхэ бултанда хэрэгтэй энэ нангин хэ­рэгтэ хабаадажа байһан зондо баяр хүргөө.

- Энэ үйлэ хэрэгэй хэмжээндэ Буряад орондомнай табан жэлэй туршада 300 гаран мянган сагдуул һуулгагдаһан байна. Дурасхаалай сэ­сэрлиг ганса байгаалияа хамгаалха ябадал бэшэ, харин бата бэхи удха­тай тон ехэ үйлэ хэрэг болоно. Эсэ­гэ ороноо хамгаалгын Агууехэ дай­най үедэ ами наһаяа алдаһан 27 сая хүнэй дурасхаалда Орос гүрэндэ энэ үйлэ хэрэгэй үедэ жэл бүри 27 сая модон һуулгагдадаг. Эдэ модод ма­най арад зоной хэтэ мүнхын баатар­шалгын һүлдэ тэмдэг болохо, - гэжэ Буряадай Толгойлогшо Алексей Цы­денов тэмдэглээ.

Хэмжээ ябуулгада хотын эмхи зургаануудай мэргэжэлтэд, ажал­шад, һурагшад, оюутад, олониитын эмхинүүдэй түлөөлэгшэд, һайн ду­ратан олоороо хабаадаа. Нангин энэ үйлэ хэрэгтэ хабаадажа байһандаа, хүн зон ехэ баяртайнууд байгаа. Эсэгэ ороноо хамгаалагшадта зорюулагдаһан дуу хүгжэмшье, ира­гуу шүлэгүүдшье зэдэлээ.

Уласхоорондын “Дурасхаалай сэ­сэрлиг” гэһэн энэ дэмбэрэлтэ үйлэ хэрэгтэ “Буряад үнэн” Хэблэлэй байшанайшье мэргэжэлтэд хабаа­даа. Саг жэлнүүдэй үнгэрхэдэ, хүжэ ногооноор надхаһан ойн хажуугаар гарахадаа, үри үхибүүдтээ, аша гуша­нартаа энэ ой манайшье ажал хэрэ­гэй үрэ дүн гэжэ омогорхолтойгоор хөөрэжэ ябахалди даа.

Энэ дэмбэрэлтэ ушараар манай “Буряад үнэн” Хэблэлэй байшанай ветеран, “Байгал” сэдхүүлэй эрхилэг­шэ, хүндэтэ Галина Хандуевна Базар­жапова-Дашеева:

Саг ошохо –

Сагдуулнууд ургаха,

Мүшэрхэнөөрөө даллан,

Мэндые хүргэхэ.

Нара татаха,

Наһа нэмээхэ,

Намтар шэмэглэхэ,

Аша зээнэртэ

Ашата хэшэг эльгээхэ,

- гэжэ саг дары зохёон найруул­жархёо.