Инаг дура уряалая!

Його, каратэ, фэн-шуй

Бидэ, хүн түрэлтэн, үндэһэн яһанһаа, шажан мүргэлһөө илгаагүй булта нэн түрүүн замби түбиин, газар дэлхэйн, байгаалиин элшэтэ хүсэнэй мэдээсэлэй талмайһаа сэхэ нүлөөтэй ажаһуунабди. Тэрэ юртэмсын амисхалай долгинууд­тай жэгдээр тааруулан, ажабайдалаа зохёобол, гайхамшагта һайн хубилалта­нууд болодог гэжэ эли.

Його, каратэ, кун-фу, ушу г.м. тами­рай янзануудаар һорилгонууд ямаршье яһанай ба шажан мүргэлэй хүнүүдтэ туһалдаг гэжэ мэдэнэбди. Тэрээн мэтэ фэн-шуй эрдэм хүн бүхэнэй хуби заяан­да амгалан тайбан, элбэг дэлбэг байдал, бэеын элүүр энхые, инаг дура, эд баялиг үршөөхэ аргатай юм.

Баялигай баханууд

Фэн-шуй эрдэмэй баялиг татадаг баха бүгэдэндэ мэдээжэ ёһотой. Тии- гээд буряад-монгол болон дэлхэйн олон арадуудай үндэһэн заншалда баха дээ­дын баялигай, хэшэгэй, элбэг дэлбэгэй hалбаралай hүлдэ тэмдэг гэжэ тоолог­додог.

Илангаяа мүнөөнэй олзын хэ­рэг эрхилэгшэдэй дунда фэн-шуйгай мүнгэнэй баха аргагүй үндэрөөр сэг­нэгдэдэг. Феликс Комаров гэжэ ородой элитэ олзын хэрэг эрхилэгшын гэртэ 17 мянганhаа үлүү тоотой мүнгэнэй ба­хануудай коллекци бии. Мүн лэ алдар суута дуушан Иосиф Кобзон, Амери­кын президент ябаһан Джордж Буш гэгшэд фэн-шуйгай олон зуугаад бахын коллекцинүүдые суглуулһан.

Эхэ дэлхэйн элшэ хүсэн

Египедэй суута пирамиданууд ба буддын шажанай дасанууд үүдэтэ нюур талаараа заабол урда зүг руу хараад байдаг. Мүн лэ үни урдын сагһаа монгол туургата арадуудай гэрнүүд үүдээрээ заабол урда зүг шэглэн табигдадаг зан­шалтай.

Фэн-шуй һургаалаар гэрэй үүдэн мүн лэ урда таладаа байха ёһотой. Урда талаһаа үүдэтэй гэртэ эршэмтэй, эдэб­хитэй оршон байдал тогтодог гэжэ тэм­дэглэгдэнэ.

“Эртэ үүрээр бододог хүн ута наһа наһалдаг” гэжэ урдын буряадай сэсэн үгэ бии. Манай элинсэгүүд үүр сайха үедэ дээдэ тэнгэриһээ һайн заяаша бурхад буужа, һэрижэ бодоод байһан хүнүүдые адисладаг гэжэ этигэдэг бай- һан. Тиимэһээ гэрэй эзэн эхэнэрнүүд за­абол үүрэй сайха үедэ гэрһээ гаража, һү сайгаа үргэдэг байһан заншалтай.

Фэн-шуй һургаалаар, эртэ үглөөгүүр, үүрэй сайха үедэ, дэлхэйн агаар “Ци” гэһэн айхабтар арюун ба хүсэтэй элшэ гэрэлээр халин хушагдадаг. Үүрэй сай­ха үедэ бодожо, наран найжые угтаһан хүнүүд ехэ хүсэ шадал нэмэжэ, бүхэли үдэрэй туршада хүнгэн солбон, омог до­рюун ябадаг.

Буряад арадай фэн-шуй һургаалтай адли үшөө нэгэ ёһо заншал соо хүн бүхэнэй Эхэ дэлхэйтэеэ таһаршагүй хол­боон тухай хэлэгдэдэг. Түрэл нютагһаа холын газарта байрлаһан хүнүүд тоон­тоёо һанажа гунигладаг. Мүн лэ түрэһэн Эхэ нютагынь хүүгэдээ үгылэн, ехээр уй­дадаг гэжэ буряад арадай ба фэн-шуй эрдэм соо адли тэмдэглэгдэнэ. Манай элинсэгүүдэй тоонтоёо тахин мүргэдэг ёһо заншал фэн-шуй һургаалтай адли удха шанартай. Эндэ эгээл шухалань гэ­бэл, хаана холо ябаашье һаа, гүн сэдь­хэлэйнгээ оёорһоо һайхан мэдэрэлэй үгэнүүдые түрэһэн нютагтаа зорюулжа ябаха хэрэгтэй. Дэлхэйн энергоинфор­мационно талмай гээшэ таһаршагүй нэгэ бүхэли холбоон ха юм. Тиимэһээ хэ­дышье холоһоо зорюулжа эльгээгдэһэн мэдэрэл бодолнууд тоонто нютагта хүрэжэ дамжуулагдадаг.

Энэрхы дурлал – эгээл шухала

Дэлхэйн бүхы арадуудай үндэһэн ёһо заншалнуудаар ба фэн-шуй һургаалаар ажамидаралай гол шухала юумэн - энэр­хы сэдьхэлэй дурлал, инаг дуран. Нэн түрүүн эхэ эсэгэдээ, аха дүүнэртээ дур­лал. Дүтынгөө түрэлхидтэ энэрхы дурла­лай мэдэрэл үзөөгүй хүн саашадаа эхэ­нэртэ, бүһэтэй хүндэ ёһото инаг дуранай хүсэ хэзээдэшье мэдэхэгүй.

Хэдышье баян бардам байдалтай, үндэр тушаалтай аад, энэрхы дурлал, инаг дура гээшые мэдэржэ үзөөгүй хүн ёһото жаргалгүй, зол талаангүй байдаг гэжэ хэлэгдэнэ.

Яагаад ёһото инаг дура уряалжа татахаб?

Фэн-шуй һургаалаар, нэн түрүүн өөрыгөө сэгнэжэ ба хүндэлжэ һураха хэ­рэгтэй. Хамаг һайн юумэндэ хүхин баяр­лажа, зүрхэндөө, нюдэндөө залиршагүй согтой галханиие носоожо бадараахань шухала.

Хүнэй дотор сэдьхэлэй мэдэрэлнүүд адли долгинуудтай байдал татадаг гэжэ хэлэгдэдэг. Гунигтай сэдьхэл – гуниг­тай ушарнуудые, аятай зохид, хүхюутэй сэдьхэлэй байдал – зол жаргалай, энэр­хы дурлалаар халиһан сэдьхэл – инаг ду­ранай долгинуудые татаха аргатай гэдэг.

Унтариин таһалга соо

Фэн-шуй һургаалаар, хуби заяандаа инаг дура татажа, наһанай нүхэртэй бо­лохо хүсэлтэй хүнүүд нэн түрүүн гэр бай­рынгаа баруун-урдахи талые эршэмтэй энергитэй болгохо ёһотой. Эндэ инаг дуранай ба гэрлэлгын сектор байдаг, тиимэһээ унтадаг таһалга байбал, ехэ һайн. Үгы гэбэл, унтадаг таһалгынгаа баруун урдахи булангые эршэмдүүлхэ хэрэгтэй.

Эндэ ариг сэбэрые сахихань шуха­ла. Элдэб бог нобшо, үмдэгдэдэггүй хубсаһанай склад байха ёһогүй. Үшөө инаг дуранай, гэр бүлын буланһаа хур­са булантай, эритэй, үзүүртэй г.м. эд ба­раа, хадхууртай ургамал сэсэгүүдые, буу зэбсэгүүдые холодуулжа гаргагты.

Тэрэнэй хажуугаар нюуса дал­да аюулнуудые һүлдэлдэг буржыгаад унжаһан ургамалнуудые, уй гашуу- далтай, гунигтай дуунуудай коллек- цинүүдые, үнгэрһэн сагта дуратай байһан хүнүүдэйнгээ гэрэл зурагуудые, гантаһан ба түгдэрхэй амһартануудые, танай бэшэ, бусад хүнүүдэй хэрэгсэл- нүүдые унтадаг таһалгаһаа гаргажа хая­ха хэрэгтэй.

Орондоо амиды хүндэл хандагты!

Орон унтадаг таһалгын үүдэнһээ зүүн гү, али гэбэл, баруун таладань та­шуу шугамаар (диагональ) табигдаха ёһотой. Тиихэдээ ороной толгой талань ханада туласа няалдаад байхань шухала.

Хэрбэеэ орон дээрэһээ үүдээр ту­алет харагдажа байбал, ехэ муу гэжэ онсо тэмдэглэгдэнэ. Унтадаг таһалга соо ванна руу, али гэбэл, үйлсэ руу гараһан балконой үшөө нэгэ үүдэн бай­бал, баһал муу тэмдэг болоно. Юундэб гэхэдэ, “ци” гэһэн һайн энерги таһалга соо тогтонгүй, үлүү үүдэнүүдээр дэгдэн гараад ябашадаг. Тэрэ ушараар үбгэ һамган хоёрой хоорондо урбалгын (из­мена), һальхай зальхай ябадалнууд, али гэбэл, нэгэниинь удаан сагай туршада гэртээ үгы байха, бэе һуларжа, шадал тэнхээ алдагдаха г.м. муу нүлөөнүүд үзэгдэдэг. Тиимэ байдал заһахын тулада ци энергиин урдадаг замаар тогтомол хээтэй болор шулуу (хрустальный кри­сталл) үлгэдэг.

Буряад-монголшуудай ёһо занша­лаар ба Хитадай фэн-шуй һургаалаар, хүн унтадаг орондоо амиды хүндэ мэ­тээр хандаха ёһотой. Орон хүнэй ами наһанай ба инаг дуранай элшэ хүсэнтэй сэхэ холбоотой ха юм. Зөөдэлэй үедэ орониие шала дээрэ шангаар хаяжа шэ­дэхэнь огто хорюултай. Заһабарилгын үедэ ороноо шангаар алхаар, һүхөөр сохихоёо ба хажуудань ехээр шууяхаяа, муухай хараалай үгэнүүдые дуугархаяа сээрлэгты!

Үбгэнһөө, һамганһаа һалаһан хүнүүд заабол орон, шэрдэг, хүнжэл болон бу­сад унтариин дэбисхэрнүүдые шэнэлэн һэлгэхэ ёһотой. Хэрбэеэ шэнэ орон ху­далдажа абаха аргагүй байбал, ядахын сагта шэрдэгһээ эхилээд, бусад унтариин хэрэгсэлнүүдые шэнэлэгты.

Ороной элшэ хүсэтэ таладань тэрээн дээрэ унтаһан хүнүүд тухай мэдээнүүд хадагалагдадаг. Тэрэ ушараар комис­сионно магазинуудһаа хуушан орон ху­далдажа абаха огто хэрэггүй. Тиигэбэл элдэб хүндэ үбшэнүүдые, үхэл, гай тод­хор өөртөө татажа магадгүйт. Гэртээшье хүндөөр үбшэлһэн хүнэй унтаһан орон шэнээр һэлгэгты, аргагүй һаа, матрас, хүнжэл г.м. заабол шэнэлхэ гэдэг.

Золтой жаргалтай инаг дура татаха хүсэлтэй хүнэй орон зохид гоё, унтариин дэбисхэрынь хододоо арюун сэ­бэр ба һайхан хангалтай байха ёһотой.

«Найман тахил» - инаг дуранай һүлдэ

Инаг дура татадаг үшөө нэгэ хүсэтэй һахюуһан – буряадаар “Үлзы тэмдэг” гээд нэрлэгдэдэг угалза. Буддын шажа­най “Найман тахил” гэһэн нангин һүлдэ тэмдэгүүдэй тоодо ородог “Найман та­хил” дууһашагүй, дүүрэшэгүй инаг дура һүлдэлдэг. Эртэ урдын сагһаа зүүн зүгэй арадууд тус һүлдэ тэмдэгээр хубсаһаяа болон бусад хэрэгсэлнүүдые шэмэглэ­дэг заншалтай. “Үлзы тэмдэгые” унта­риингаа дэбисхэр дээрэ хадхан оёдог, али гэбэл, саарһан ба бүд дээрэ зураһан дүрсыень шэрдэг дороо табяад байха хэрэгтэй.

Үшөө инаг дуранай буланда улаан үнгэтэй хоёр шубуун дэнгүүдые табяад байхада туһатай. Тиигээд долоон хоно­гой нэгэ дахин заабол һүниин тэндэ тэ­дэнээ носоогоод, галханууд руунь хара­жа, инагайнгаа түхэл дүрсые һанаандаа тодоор үзэн һанагты. Хажуудань заабол хүхюутэйгээр энеэбхилһэн өөрыгөө һанаандаа харахань шухала.

Унтариин таһалга соо ганса эхэнэ­рэй дүрсэнүүд байха ёһогүй. Заабол бүһэтэй хүнэй эхэнэртэй хамта зурагууд табигдадаг.

Үшөө эндэ доодо талань пүлхэгэр томо аад, утанууд уйтан хоолойтой лонхонуудые (вазы) табяад байхада, ехэ һайн. Тиимэ лонхонууд ци энергиие эрхим һайнаар барижа хадагала­ад, бүлын гэшүүдтэ амжалта туйлалта­нуулые үршөөдэг убадистай. Лонхонуу­дай оёорто хашарһан мүнгэнүүд, үнэтэ шулуунууд болон эд баялигай һүлдэтэй эрдэнитэ зүйлнүүд табигдадаг заншал­тай. Тэрэ лонхонууд руу амидышье, хэ­мэлшье сэсэгүүдые табихань огто хорюултай. Нэгэдэхеэр, сэсэгүүдтэй лонхо- нууд уһанай байһан тэмдэгтэй, хоёрдохёор, сэсэгүүд инь гэжэ муу энергиин һүлдэтэй юм.

Хуушан хубсаһаяа хаягты!

Гэр байра соо ямаршье хүгжэлтэгүй, хубилалтагүй, зогсонги энергиин тогто- хогүйн тулада фэн-шуй һургаал хуушан хубсаһа ба хэрэгсэлнүүдые һалгажа бай­ха тухай онсо тэмдэглэдэг. Шэнэ самса худалдажа абаа һаа, тэрэ дары ямар нэ­гэн хуушан самсаяа оложо, ондоо хүндэ үгэгты, али гэбэл, хайрагүйгөөр бог ноб­шотой хаягты.

Уралай помада наймааһаа абабал, заабол косметичкэ соогоо бэдэржэ, хуу­шан помада олоод хаягты г.м.

Үргэлжэ иимэ бүтээл үйлэдэжэ бай­бал, танай гэртэ хододоо баяр, зориг ба­дараадаг һайн элшэ хүсэнүүдэй долги­нууд таһалдангүй урдажа байха.

Инаг дуранай тарни

“ТО-ДО – СИ-РО АН – ВАТ – МОНО -РАН” гэһэн буддын шажанай тарни хүнэй хуби заяанда инаг дура татадаг убадистай.

Тус тарниие һарын литээр 15-ай үдэр уншажа эхилдэг. Сэдьхэлэй амгалан тэ­нюун байдалда уншахань тон шухала. Үшөө энэ үдэр мяхан, һонгино, чеснок, үндэгэн г.м. эдеэ хоолһоо арсажа масаг- лабал, тарниин хүсэн улам шангадаха гэжэ хэлэгдэнэ.

Тарниие гурбан үдэрэй туршада үдэр бүри дүрбэ дахин шэбэнэн дабтадаг гу­римтай. Тиихэдээ асари хүсэтэй шэди­тэ тарниин убадиста үнэнхэ зүрхэнһөө этигэн уншахань маша шухала юм.

«Би эгээл арюун сэбэрби»

Инаг дурые уряалжа татахын хэрэгтэ хүнэй бэеын гадаада талын түхэл маяг ехэ удха шанартай гэжэ эли. Харин бэе­ын маяг түхэл хүнэй өөртөө хандалгаһаа сэхэ дулдыдадаг. Хэрбэеэ та өөрынгөө нюур шарай, бэеын түхэл тухай ходо­доо муугаар һанажа, үдэр бүри мянгаад дутагдалые оложо байбал, оршолонто түби руу “би муу муухай хүмби” гэһэн мэдэрэлэй долгинуудые ябуулнат.

Хүнэй оршон тойронхи замби руу эльгээһэн ухаа сэдьхэлэйнь мэдэрэл- нүүд ба бодолнууд улам хүсэтэй боложо арьбажаад, өөртэнь һөөргөө бусадаг. Тиимэһээ тэрэ хүн үдэрһөө үдэртэ до­ройтожо, муухай дүрсэтэй болодог гэжэ фэн-шуй һургаалнууд заадаг.

Харин үдэр бүри “Би эгээл аятай зо­хидхон, арюун сэбэрхэнби” гэжэ бата­лан һанажа ябабал, заабол һайн тээшээ хубилалтанууд болодог.