297
Ойн түмэрһөө боложо, Буряад Уласай дэбисхэртэ «Онсо ушаралта байдал» гэһэн гурим абтаба. Урид Яруунын ба Баунтын аймагуудта онсо ушаралта байдал соносхогдоо һэн. Тиигэжэ уласай бүхы аймагуудта түймэрэй аюулгүйе хангаха ба онсо ушаралта байдал һэргылхэ, усадхаха талаар комиссиин шиидхэбэреэр иимэ гурим тогтоогдоо.
Үнгэрһэн долоон хоногто Буряад Уласай Толгойлогшын хүтэлэн ябуулһан суглаанда ойн түймэрнүүд тухай элидхэл хэгдэһэн байна. Улас түрын ойн ажахын агентствын хүтэлбэрилэгшэ Сергей Борошноев нютаг можодо түймэртэй тэмсээндэ техникэ ба зониие улам олоор татахын тула онсо ушаралта байдалай гурим оруулха тухай дурадхаа.
- Орёо байдал хараадаа абажа, холбоото уласай штабта хандаабди. Тиин түймэр унтарааха нэмэлтэ туһаламжа үзүүлхыень гуйһан байнабди. Түймэр холо, хүрэжэ ошоходо бэрхэшээлтэй газарта гарана, тиихэдэ шанга һалхитай байна. Нютаг можодо онсо байдалай гурим оруулбал, олон техникэ түймэр саралгада татажа шадахабди, тэрэ тоодо худаалдаа наймаанай эмхинүүдэй. Мүнөө бидэндэ гэнжэтэ техникэ хэрэгтэй, - гэжэ Сергей Борошноев хэлэбэ.
Үнгэрһэн долоон хоногто үнгэргэгдэһэн Түймэрэй аюулгүйе хангаха ба онсо ушаралта байдал һэргылхэ, усадхаха талаар комиссиин зүблөөндэ Буряад Уласай Засагай газарай Түрүүлэгшын орлогшо Вячеслав Сухоруков ой руу ороһон зон нютагай захиргаанда тэмдэглүүлжэ байха тухай хэлэбэ.
- Мүнөө үсөөн тоото арадуудай түлөөлэгшэдтэ баабгай агнаха зүбшөөл үгтэнхэй. Агнууриин хаһа июниин 10 болотор үргэлжэлхэ. Энэ хэрэг бидэ хизаарланагүйбди, теэд ангуушад ойн түймэрэй гарабал, харюусаха тухай һанажа ябаха ёһотой, - гэжэ Вячеслав Сухоруков тэмдэглэбэ.
Жэлэй эхинһээ Буряад Уласай дэбисхэр дээрэ 102,6 мянган гектар талмайда ойн 174 түймэр бүридхэлдэ абтаа. Үнгэрэгшэ жэлдэ энэ сагай хугасаада 14,5 мянган гектар талмайда 93 түймэр гараһан байна. Майн 13-най үглөөнэй байдалаар Баунтын ба Яруунын аймагуудта 53 000 гектар талмайда ойн 22 түймэр боложо байгаа. Сүүдхын туршада Баунтын ба Захааминай аймагуудта үшөө 4 түймэр элирүүлэгдээ.
Автор: Янжима ДАРМАЕВА бэлдэбэ
Фото: Анна Огородник
