344
Буряад Уласта һайн дураараа туһа хүргэхэ ажаябуулга дэмжэхэ аргануудые баталба. Тус арганууд һайн дуратанай үүсхэлнүүдые, мүнгэн зөөриин, эмхидхэлэй, мэдээсэлэй, зүбшэл үгэлгын ба эд зөөриин талаар дэмжэхэ шэглэлтэй. Буряад Уласта һайн дуратанай 1064 нэгэдэл ба эмхи хүдэлнэ, 90 000 гаран хүн энэ хэрэгтэ хабаадана.
- Эдэ арганууд Буряад ороной ажаһуугшадые һайн дуратанай эмхи нэгэдэлнүүдтэ улам ехээр татаха, манай ниигэмэй хүгжэлтэдэ ехэ хубита оруулха гэжэ этигэнэб. Залуушуулай хэрэгүүдээр агентство дэмжэлгын аргануудые амжалтатай бэелүүлхэ хэрэгтэ оролдосотойгоор хабаадаха, - гэжэ залуушуулай хэрэгүүдээр уласай агентствын хүтэлбэрилэгшэ Татьяна Парпаева тэмдэглэбэ.
Һайн дуратанай эмхинүүдтэ мүнгэн тэдхэмжэ үзүүлэгдэхэ. Тэрэнэй ашаар ниигэмэй түсэлнүүд бэелүүлэгдэхэ, хэмжээ ябуулгануудта, акцинуудта хабаадаха, уласай хэмжээнэй мүрысөөнүүдые эмхидхэхэ арга боломжо үгтэхэ.
Һайн дуратан урмашуулагдаха, гүрэнэй ба албан газарай шагналнуудта хүртэхэ. Тэрээнһээ гадуур үргэн дэлисэтэй тамирай ба соёлой хэмжээ ябуулгануудта түлбэригүйгөөр орохо, нютаг можын хүтэлбэрилэгшэдтэй, элдэб һалбаринуудай мэдээжэ ажаябуулагшадтай уулзалгануудта хабаадаха аргатай.
Һайн дуратан тухай баримтанууд талаан бэлигтэй хүүгэдэй ба залуушуулай нютаг можын баазада оруулагдаха.
Һайн дуратанай ажаябуулга эмхидхэгшэд зүбшэлэлгын ба методическа дэмжэлгэ абаха. Энэ талаар тэдэ һуралсал гараха юм. Мэдээсэлэй талаар дэмжэлгэ мүн шухала гэжэ тэмдэглэлтэй.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
