2025 ондо Буряад Уласта элүүрые хамгаалгын шэнэ объектнүүд нээгдэхэ

Холбоото уласай «Элүүрые хамгаалгын эхин шатын хэһэг һэльбэн шэнэлэлгэ» түсэлэй хэмжээндэ 2025 ондо Буряад Уласта шэнэ объектнүүд нээгдэхэ. Нижнеангарскда 992,5 хоёролжон метрэй талмайда 130 саяһаа үлүү сэнтэй поликлиникэ, Түнхэндэ 882 хоёролжон метрэй талмайтай поликлиникэ нээгдэхэ. Түнхэнэй аймагай түбэй эмнэлгын газарай поликлиникэдэ 98 сая түхэриг гаргашалагдаха. Тиихэдэ Хориин аймагай түбэй эмнэлгын газарай поликлиникэдэ 138 сая түхэриг, Ахын аймагай түбэй эмнэлгын газарай поликлиникэдэ 86 сая түхэриг гаргашалагдаха юм. Шэнэ байшанууд тус тустаа 1057 ба 600 хоёролжон метрэй талмай эзэлхэ.

Буряад Уласай Элүүрые хамгаалгын яаман, эмнэлгын эмхи зургаанууд конкурс үнгэргэжэ, гүрэнэй хэлсээнүүдые баталжа, түргэн суглуулагдадаг гурбан амбулатори, хоёр ФАП бариха юм. Тиихэдэ аймагуудай түбэй эмнэлгын дүрбэн газарта ехэ заһабарилга эхилхээр хараалагдана. Тэрээнһээ гадуур Тарбагатайн аймагай Вознесеновкэ һууринда 2-дохи поликлиникын амбулатори баригдаха. Энэ хэрэгтэ 37 сая түхэриг гаргашалагдаха. Баргажанай аймагай Баянгол ба Улюн һууринуудта 130 хоёролжон метрэй талмайтай эмнэлгын амбулаторинууд бодхоогдохо. Баунтын аймагай Уакит  ба Усть-Джилинда тосхонуудта ФАП-ууд нээгдэхэ. ФАП бүхэн 13 сая түхэригэй сэнтэй. 68 хоёролжон метрэй талмай эзэлхэ юм. Аймагуудай түбэй эмнэлгын газарнуудта ехэ заһабарилга хүлеэгдэнэ. Баргажанай аймагай эмнэлгын газарта уһаар хангалгын һужаанууд, дулаа үгэлгын системын приборнууд шэнэлэгдэхэ. Баунтын аймагай түбэй эмнэлгын газарта, Маловский тосхоной амбулаторидо мүн заһабарилга хүлеэгдэнэ. Тэрээнһээ гадуур Хяагтын аймагай түбэй эмнэлгын газарай орой шэнэлэгдэхэ, 4-дэхи дабхарта заһабарилга болохо. Хэжэнгын аймагай эмнэлгын газарта түймэрһөө һэргылэлгын системэ табигдаха, оройнь шэнэлэгдэхэ, бусад ажалнууд хүлеэгдэнэ.

2025 оной эсэтэ Буряад Уласай аймагуудай ажаһуугшад мүнөө сагай эрилтэдэ таарама түхеэрэлгэнүүдтэй, һаруул уужам кабинедуудтай шэнэ байшангуудта эмнэлгын шанартай туһа абажа эхилхэ.

- Элүүрые хамгаалгын эхин шатын хэһэг һэльбэн шэнэлхэ хэрэг манай һалбариин гол бодолго болоно. Мүнөө жэлдэ түргэн суглуулагдадаг байшангуудай технологи анха түрүүшынхиеэ томо поликлиникануудта хэрэглэхэбди. Иимэ байшангууд түргэн сагай туршада бодхоогдодог, эд зөөриин талаар гаршань бага, - гэжэ Буряад Уласай Засагай газарай Түрүүлэгшын орлогшо - Элүүрые хамгаалгын сайд Евгения Лудупова тэмдэглэбэ.

Үндэһэтэнэй «Эдэбхитэй ута наһан» түсэлэй «Элүүрые хамгаалгын эхин шатын хэһэг һэльбэн шэнэлэлгэ» гэһэн холбоото уласай түсэлэй хэмжээндэ ажаһуугшадта эмнэлгын шанартай туһа үзүүлхэ талаар ажал үргэлжэлхэ гэжэ һануулнабди. Тэрэнэй түлөө эмнэлгын газарнуудай материальна-техническэ бааза һайжаруулагдаха.