Буряад Улас «Ухаатай хото» гэһэн үндэһэтэнэй шангай шорт-листдэ оробо

Нютаг можонуудай тоо оньһоной эрхим шиидхэбэринүүд «Ухаатай хото» гэһэн үндэһэтэнэй III шангай хэмжээндэ тэмдэглэгдэбэ. Москва хотын «Россия» гэһэн үндэһэтэнэй түбтэ илагшадта шан барюулагдаба. Буряад Улас финалистнуудай тоодо ороо.

2025 ондо тус шанда хүртэхын түлөө Россиин 57 нютаг можоһоо 500 гаран хабаадагшад мүрысөөндэ оролсоо. Үндэһэтэнэй III шангай программын түгэсхэлдэ илагшад 34 шэглэлээр урмашуулагдаа.

Буряад Улас оюун ухаанай адаглалгын системэтэй танилсуулжа, «Аюулгүй хото» шэглэлээр шорт-листдэ ороо. Москва хото «Гран-при» шанда хүртөө, «Эдэбхитэй хото» шэглэлдэ Санкт-Петербург илалта туйлаа, «Урмашалга» гэһэн шэглэлдэ Краснодарай хизаар түрүүлээ, «Хото альган дээрэ» шэглэлдэ Ленинградай можо 1-дэхи һуури эзэлээ. Харин «Коммунальна хангалгын байгуулга» шэглэлдэ Москвагай можо илаба.

- «Ажамидарал хангамжын ажахы» гэһэн үндэһэтэнэй түсэлэй хэмжээндэ барилга, гэр байрын ажахы, архитектура, хотонуудай түһөө түсэб зохёолго хүгжөөхэ түсэбүүд тоо оньһоной технологинуудта үндэһэлэн дүүргэгдэнэ. «Ухаатай хото» гэһэн шан заншалта ёһоор тоо оньһоной продукт, хотын аюулгүйе дээшэлүүлхэ, ажаһуугшадай ажамидаралай шанар һайжаруулха  платформонуудые хүгжөөжэ байһан нютаг можонуудые урмашуулна, - гэжэ Оросой Холбоото Уласай Барилгын ба ЖКХ-гай сайд Ирек Файзуллин хэмжээ ябуулгада хабаадагшадые мэндэшэлэн амаршалхадаа хэлэбэ.

Үндэһэтэнэй «Ухаатай хото» гэһэн шан тоо оньһоной дүй дүршэл, түсэлнүүдэй дүнгүүдые  нэбтэрүүлхэ, олондо тарааха, Россиин Юрэнхылэгшын табиһан бодолгонуудые дүүргэхэ үүргэтэй.