Буряад Уласай ажаһуугшадта Россиин Юрэнхылэгшын баярай бэшэгүүд барюулагдаа

Майн 26-да Улаан-Үдэдэ Оросой Холбоото Уласай Юрэнхылэгшын магтаалай тэмдэгүүдые ба Буряад Уласай гүрэнэй шагналнуудые барюулалгын баяр ёһолол үнгэргэгдэбэ. Ёһолол Буряад Уласай Үдэртэ зорюулагдаа.

Хэмжээ ябуулгада хабаадагшадые Алексей Цыденов амаршалаа.

- Хүндэтэ нютагаархид! Манай улас ба гүрэн дотор бултанай хабаадалгатайгаар боложо байһан үйлэ хэрэгүүд манай хамтын ба хүн бүхэнэй ажал болоно. Оролдолгын, һанаагаа зоболгын, зүдхэмжын ашаар дүнгүүдые туйланабди. Мүнөө ажалдаа амжалта туйлаһан, оролдолго гаргаһан зониие тэмдэглэхэ хүсэлтэйбди. Бидэ харюусалга ехэтэй юрын бэшэ сагта ажаһуунабди, теэд тон шухалань гэхэдэ, һууридаа байнгүй, урагшаа дабшанабди, ажалаа ябуулнабди. Ажалай ба байлдаанай талмайнуудта, ниигэмэй ба соёлой һалбаринуудта, хаа хаанагүй бүхы юумэн манай гарта. Таанадые амаршалнаб, булта урагшаа дабшая! - гэжэ Буряад Уласай Толгойлогшо хэлэбэ.

Эгээ олон шагналнуудые һайн дуратан абаба. Тэдэ ниигэмэй удха шанартай хэмжээ ябуулгануудые бэлдэлгэдэ ба үнгэргэлгэдэ эдэбхитэй хабаадаһанай түлөө урмашуулагдаба.

Оросой Холбоото Уласай Юрэнхылэгшын баярай бэшэгээр #МЫВМЕСТЕ гэжэ нютаг можын штабай хүтэлбэрилэгшэ Арина Дубровина шагнагдаба. Тэрэнэй хабаадалгатайгаар сэрэгэй тусхай үйлэ хэрэгүүдэй эхинһээ фронт руу тон хэрэгтэй болодог 242 тонно ашаа суглуулагдажа эльгээгдээ. Ринчин Дашицыреновэй буян үйлэдэлгын жасын юрэнхылэгшэ, «Добродом» түбэй һайн дуратан Алексей  Жамсуевта Оросой Холбоото Уласай Юрэнхылэгшын баярай бэшэг мүн барюулагдаа. Алексей Жамсуев сэрэгэй тусхай операциин эхилһэнһээ хойшо дайшалхы үйлэ хэрэгүүдэй боложо байһан газар руу гуманитарна туһаламжа 18 дахин абаашаһан байна. Тиихэдэ Хориин аймагай болбосоролой хүтэлбэриин хүмүүжүүлгын талаар мэргэжэлтэн, Россиин үхибүүдэй ба эдиршүүлэй түбэй ахамад эксперт Маргарита Намсараева Юрэнхылэгшын баярай бэшэгээр шагнагдаба.

Маргарита Намсараева сэрэгшэдые дэмжэхэ зорилготойгоор олон хотонуудай түлөөлэгшэдтэй, Буряад Уласай ба Яхадай һайн дуратанай бүлгэмүүдтэй нягта холбоотойгоор ажалаа ябуулдаг. Тэрэ Краснодар, Новороссийск, Санкт-Петербург, Саратов, Таганрог, Улаан-Үдэ, Мариуполь, Старобешево, Донецк хотонуудай госпитальнуудаар ябажа, тэндэ аргалуулжа байһан сэрэгшэдтэ туһалһан байна. 

Баяр ёһололой хэмжээ ябуулгада «Матери России» гэһэн бүхэроссиин хүдэлөөнэй нютаг можын таһагай түлөөлэгшэдые тэмдэглэбэ. Тэдэ ажамидаралай шанар дээшэлүүлхэ үүргэтэй программануудые бэелүүлхэ хэрэгтэ туһална. Тиин Оросой Холбоото Уласай Юрэнхылэгшын баярай бэшэг Буряад Уласай Хүн зониие ниигэмэй талаар хамгаалгын яаманай бэеэ дааһан эмхи зургаануудай Ассоциациин түрүүлэгшэ, «Матери России» эмхиин Буряад Уластахи таһагай түрүүлэгшэ Лариса Давыдовада барюулагдаа. Лариса Ильинична ниигэмэй һалбарида 30 жэлэй туршада ажаллана. Тэрэнэй хүтэлбэри доро сэрэгэй үйлэ хэрэгүүдэй боложо байһан газар руу тепловизор, далдалан нюулгын гүльмэнүүд, шубуун дэнгүүдтэ хэрэгтэй болодог парафин, госпитальнуудта аргалуулжа байһан сэрэгшэдтэ һүүжэ хамгаалха дэрэнүүд, ортопедическа болон бэшэшье хэрэгтэй бүтээлнүүд эльгээгдэһэн байна. 

Буряад Уласай засагай эмхинүүдэй түлөөлэгшэд хуули нарижуулгын, үндэһэтэнэй түсэлнүүдые бэелүүлгын, ниигэмэй удха шанартай хэмжээ ябуулгануудые бэлдэлгэдэ ба үнгэргэлгэдэ эдэбхитэй хабаадаһанай түлөө Россиин Юрэнхылэгшын талаһаа урмашуулагдаба.

Буряад Уласай Н.А. Семашкын нэрэмжэтэ эмнэлгын газарай врач Зоригто Балханов Алдар Цыденжаповай медаляар шагнагдаба. Зоригто Владимирович абатаяа хамта голой хүйтэн уһан руу унаһан зониие абараа.

Буряад Уласай Толгойлогшын Зарлигаар «По зову долга и сердца» медаляар Хориин түбэй эмнэлгын газарай ахамад врач Сергей Цыренжапов шагнагдаа. 2024 ондо Сергей Бимбаевич Екатеринбургын сэрэгэй ба клиническэ госпиталиин тусхай үүргэтэй отрядай бүридэлдэ Луганскын можо руу албанай хэрэгээр эльгээгдэһэн байна. Цыренжапов 150 операци хэжэ, шархатаһан сэрэгшэдые абараа.

Тиихэдэ Буряад Уласай гайхамшаг ажаһуугшадта «Буряад Уласай арадай зүжэгшэн», «Буряад Уласай гүрэнэй ба нютагай засагай хүтэлбэриин габьяата хүдэлмэрилэгшэ» гэжэ хүндэтэ нэрэ зэргэнүүд олгогдоо, Буряад Уласай Толгойлогшын Хүндэлэлэй грамота, «Буряад Уласай үмэнэ габьяагай түлөө» медаль барюулагдаа.