Валерий Доржиев, Максим Шагдаров гэгшэд «Буряад Уласай хүндэтэ эрхэтэн» гэһэн үндэр нэрэ зэргэдэ хүртэбэ

Майн 26-да «Буряад Уласай хүндэтэ эрхэтэн» гэһэн  нютаг можын гүрэнэй дээдэ нэрэ зэргэ уласай ажаһуугшадта олгогдобо. Онсо габьяагай түлөө, уласай ниигэмэй ба эдэй засагай хүгжэлтэдэ оруулһан ехэхэн хубитын түлөө үндэр нэрэ зэргэ Арадай Хуралай гурбан зарлалай һунгамал Валерий Доржиевта олгогдоо. Валерий Пурбуевич буян үйлэдэлгын хэрэгтэ эдэбхитэй оролсодог, тамирай, соёлой, оюун ухаанай һалбаринуудые дэмжэдэг, туһа үзүүлдэг юм. 2009 ондо тэрэ Улаан-Үдэ хотодо тамирай «Номто» гэһэн түрүүшын үмсын клуб нээһэн байна. Тус клубта боксоор ба сүлөөтэ барилдаагаар Олимпиин наадануудай ерээдүйн одонуудые хүмүүжүүлдэг.

 Валерий Доржиев олон жэлэй туршада соёлой байшангуудай, дасангуудай ба һүмэнүүдэй, тамирай объектнүүдэй, үхибүүдэй элүүржүүлгын лагерьнуудай   барилгада ба заһабарилгада аргагүй ехэ туһа хүргэдэг юм. Тиихэдэ тамиршадые ба ажалай ветерануудые гэр байратай болгохо хэрэгтэ эдэбхитэй хабаададаг.

Буряад Уласай ба Сэлэнгын аймагай хүгжэлтэдэ оруулһан хубитын, олон жэлэй туршада амжалта түгэс ажаллаһанай түлөө «Буряад Уласай хүндэтэ эрхэтэн» гэжэ үндэр нээрэ зэргэдэ Сэлэнгын аймагай ветерануудай зүблэлэй гэшүүн, Буряад Уласай Толгойлогшын дэргэдэхи ахалагшадай Зүблэлэй гэшүүн Максим Шагдаров хүртэбэ.
Максим Жамсаранович 1964 онһоо 1997 он болотор Сэлэнгын аймагай ба уласай хүдөө ажахы хүгжэлтэдэ бэеэ зорюулаа, олониитын ажабайдалда эдэбхитэйгээр хабаадаа. Ажалайнгаа намтар үнгэрэгшэ зуун жэлэй 60-аад онуудта агрономоор эхилһэн юм. Удаань «Темник» совхозой захиралаар хүдэлөө. Уласай урда зүгтэ ажаллажа байхадаа, газар элдүүрилгын шэнэ системэ байгуулжа нэбтэрүүлһэн байна. Газар элдүүрилгын шэнэ гуримай ашаар шэниисын һайн ургаса абтаһан юм. Максим Жамсарановичай дүй дүршэл мүнөө болотор Буряад орондо хэрэглэгдэнэ. Уласай талата газарнуудта тэрэ шэнэ арга зүйнүүдые нэбтэрүүлээ, витаминна завод байгуулаа, шасаргана үйлэдбэрилжэ эхилээ. Мүнөөдэр энэ жэмэс Сэлэнгын бренд болонхой.

1994 ондо Максим Жамсаранович Сэлэнгын зоной нэгэдэлэй юрэнхылэгшээр һунгагдаа. Тэрэнэй үүсхэлээр уласай бусад аймагуудай нэгэдэлнүүд мүн байгуулагдажа эхилээ һэн. Тиин нэгэ нютагтай зоной нэгэдэжэ, холбоо барисаагаа бэхижүүлхэ хэрэгтэ тус үүсхэл ехэ нүлөө үзүүлээ.

- Эрхэтэнэй харюусалга, ямаршье сагта зондо туһалха хүсэл залуушуулда, арад зондо  жэшээ болоно. Валерий Пурбуевич Максим Жамсаранович хоёр тухай юрын үгэнүүдээр хэлээ һаа, тэдэ манай түшэг тулга болоно, - гэжэ Буряад Уласай Толгойлогшо тэмдэглээ.