Буряад Уласай курсантнууд «Сэрэгшэ» гэһэн түбэй бүхэроссиин турнирта хабаадаха

Майн 28-да Хабаровск хотодо үнгэргэгдэһэн Алас Дурнын тойрогой Зүблэлдэ «Сэрэгшэ» гэжэ түбэй курсантнуудай хоорондо бүхэроссиин турнир үнгэргэхэ тухай хэлэгдэбэ. Энээн тухай холбоото уласай тойрогоор Россиин Юрэнхылэгшын бүрин эрхэтэ түлөөлэгшэ,  «Сэрэгшэ» түбэй адаглан харалгын зүблэлэй түрүүлэгшэ Юрий Трутнев мэдээсэбэ.

- «Сэрэгшэ» гэһэн түб 2022 ондо Оросой Холбоото Уласай Юрэнхылэгшэ Владимир Владимирович Путинай даабаряар байгуулагдаа. Түбтэ залуушуулые сэрэгэй ба тактикын дадал шадабарида һургадаг юм. Үсэгэлдэр Хабаровск хотын «Сэрэгшэ» гэһэн түбэй таһагай ажалтай танилсаабди. Инструкторнууд ба хүмүүжэмэлнүүд һайнаар хүдэлнэ. Сэрэгэй ба тамирай талаар бэеэ һорилго, Эхэ орондоо дуратайгаар һургаха гээшэ тон шухала. Энэ ажал ябуулхадаа, гүрэнөө хүсэтэй болгонобди, - гэжэ Юрий Трутнев хэлэбэ.

«Сэрэгшэ» гэһэн түбэй таһагууд Россиин 21 нютаг можодо нээгдээ, тэрэ тоодо Алас Дурнын тойрогой Буряад Уласта, Яхадта, Хабаровскын хизаарта, Сахалинай можодо, Камчаткада. «Сэрэгшэ» түбтэ 77980 курсант бэлдэлгэ гараа. Сэрэгэй эхин бэлдэлгын 8000 гаран багшанар түбэй дэргэдэ мэргэжэлээ дээшэлүүлһэн байна. Һануулхада, Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ Юрий Трутнев 2023 оной августын 23-да Буряад орон руу албанай хэрэгээр ерэһэн байна.

Үнгэргэгдэхэеэ байһан бүхэроссиин мүрысөөн курсантнуудые бэлдэлгэдэ сэгнэлтэ үгэхэ. «Сэрэгшын зам» гэжэ нэрлэгдэһэн сэрэгэй ба тактикын мүрысөөн Саха Уласта (Яхадта) байгша оной сентябрь һарада үнгэргэгдэхээр хараалагдана.  Тус тэмсээн түбэй таһагуудай курсантнуудай хабаадалгатай эгээ ехэ хэмжээ ябуулга болохо.

Турнир хабаадагшадай бүхы талануудые хүгжөөхэ, бэеынь һорихо, сэрэгэй эхин дадал шадабаринуудые олгуулха, Эсэгэ ороноо хамгаалха талаар эрхэтэнэй уялга дүүргэхэ бэлэн байлгаха зорилготой.

- Мүрысөөнэй үедэ дайнай үеын сагтай адлирхуу оршон байгуулагдаха. Эндэ курсантнуудай бэлэдхэлэй хэмжээн сэгнэгдэхэ, эгээ хүсэтэй команда элирүүлэгдэхэ. . «Сэрэгшын зам» мүрысөөн сэрэгэй ба тамирай талаар бэлдэлгын, бэеэ һорилгын нэрэ хүндэ дээшэлүүлхэ, - гэжэ «Сэрэгшэ» түбэй захиралай орлогшо Дмитрий Кириенко тэмдэглээ.

Түсэбэй ёһоор, мүрысөөндэ хабаадагшад 10 хүнһөө бүридэһэн команданууд боложо хубаарилагдаха. Командын бүридэлдэ ударидагша, мэргэн буудагша, хүтэлэгшэгүйгөөр ниидэдэг аппарадай оператор, буудагша, сапёр ба санитар байха ёһотой. Турнирай ябаса, курсантнуудай аюулгүйе дүй дүршэлтэй инструкторнууд адаглан хараха, ттихэдэ хүтэлбэриин штабта хүтэлэгшэгүйгөөр ниидэдэг аппарадай операторнууд, нүүлгэн зайлуулгын команда орохо. Турнирта хабаадагшад агаарай тагнуулай ба адаглалгын хэрэгсэлнүүдээр, автомат-лазертагуудаар, оптическа шагаабаритай ба мэргэн буудалгын  винтовконуудые һажааһан түхэлнүүдээр,  FPV-дронуудаар хангагдаха.

Мүрысөөндэ дүн хамта 210 хүн хабаадаха. Түб бүхэн 10 хүнһөө бүридэһэн 1 команда табиха.

«Сэрэгшэ» гэһэн түбэй Буряадтахи таһаг Росси дотор эгээ түрүүн нээгдэһэн таһагуудай нэгэн болоно. Мүнөө тэндэ 200 гаран хүн һурана. Түбэй нээгдэһэнһээ хойшо 5000 гаран һурагшад ба оюутад тэндэ бэлдэлгэ гараһан байха юм. Буряад Уласта элдэб шэглэлтэй найман программа бэелүүлэгдэнэ. Тэрэ тоодо зунай сагта 21 үдэрэй туршада курсантнууд эмнэлгээр, хүтэлэгшэгүйгөөр ниидэдэг аппарадаар, буудалгаар, инженернэ ба тактическа талаар бэлдэлгэ гарадаг юм.