Алексей Цыденов үхибүүдэй уласай клиническэ эмнэлгын газар 25 жэлэйнь ойгоор амаршалба

Уласай үхибүүдэй клиническэ эмнэлгын газарай байгуулагдаһаар 25 жэл гүйсэбэ. Энэ ушараар Буряад Уласай Толгойлогшо Алексей Цыденов майн 29-дэ эмнэлгын газарай коллективтэй уулзажа, ойн баяраар амаршалаа, шагналнуудые барюулаа.

Алексей Цыденов «Буряад Уласай габьяата эмшэн» гэһэн үндэр нэрэ зэргын ба «Хүндэтэ залан хүтэлэгшэ» гэһэн тэмдэгэй үнэмшэлгэнүүдые олон жэлэй туршада амжалта түгэс хүдэлжэ байһан эмшэдтэ барюулба. Тэдэ нэгэнтэ бэшэ хүүгэдэй ами наһа абарһан габьяатай, суг хамта хүдэлжэ байһан нүхэдтөө, үхибүүдэй түрэлхидтэ тон хүндэтэй зон болоно.

«Буряад Уласай габьяата эмшэн» гэһэн хүндэтэй нэрэ зэргэ травматолог-ортопед, тус шэглэлээр эмнэлгын газарай таһагай залан хүтэлэгшэ Александр Цыбановта, хирург Сергей Колдуновто олгогдобо. «Хүндэтэ залан хүтэлэгшэ» гэһэн тэмдэг нарай хүүгэдэй ба сагһаа урид гараһан хүүгэдэй патологиин таһагые даагша Елена Казаковада барюулагдаба.

«Хүүгэдэй эмшэн - тусгаар ондоо эмшэн. Хүүгэдэй үбдэхэдэ, гэртэхин ехээр һанаагаа зободог. Тиимэһээ хүүгэдэй эмшэд онсо харюусалгатай. Танай ажалай, танай һайхан сэдьхэлэй түлөө баяр хүргэнэб. Үхибүүд ехээр үбдэнгүй, элүүр энхэ байхань болтогой!» - гэжэ эмшэдтэ Буряад Уласай Толгойлогшо хандаба.

Хамта хүдэлдэг залуу нүхэдөө эмнэлгын газарай мэргэжэлтэн Ирина Хусаева амаршалба. Ирина Фёдоровна эмнэлгын талаар ахамад врачай орлогшоор 2000 онһоо 2007 он болотор хүдэлһэн байна.

 «2000 оной эхиндэ, больницын һая нээгдээд байхада, эндэ хүдэлхэеэ ерээ һэм. Тиихэдэ эмнэлгын газар нэгэл байшантай байгаа, 11 мэргэжэлтэд хүүгэдые үзэдэг һэн. Мүнөө олон таһагууд нээгдэнхэй, хирургиин байшан аргагүй томо. Хүүгэд дэлхэйн эрхим стандартнуудаар аргалуулна. Минии һанахада, манай эмнэлгын газар ерээдүй сагта улам һайжарха. Таанадаараа суг хамта байһандаа баяртайб», - гэжэ Ирина Хусаева хэлэбэ.

Мүнөө уласай үхибүүдэй клиническэ эмнэлгын газар бүхы шэглэлнүүдээр туһа үзүүлнэ. Эндэ эхин шатын эмнэлгын туһа үзүүлхэһээ эхилээд үндэр арга зүйнүүдые хэрэглэн аргалдаг 40 хэсэг тоологдоно. Жэл бүри ДРКБ-дэ 13000 гаран хүүгэд аргалуулна.

«Би 10 жэлэй туршада Иркутск хотын нарай хүүгэдэй хирургиин ба реанимациин таһагта хүдэлөөб. Удаань Кузбассай можын эмнэлгын газарай хирургиин таһагые даагшаар ажаллааб. Буряад Улас руу ДРКБ-н ахамад врач Анатолий Дмитриевай урилгаар ерэһэн байнаб. Эндэ хүдэлхэеэ ерэхэдээ, эмнэлгын талаар туһаламжа, аргашадай дүй дүршэл үндэр хэмжээндэ гэжэ тэмдэглээ һэм», - гэжэ хирургиин туһаламжын талаар ахамад врачай орлогшын уялга саг зуура дүүргэгшэ Чимит Очиров хэлэбэ.