Улаан-Үдэдэ «Сагаан толгой» гэһэн монгол бэшэгэй II мүрысөөн үнгэрөө

Буряад-монгол сэбэр бэшэлгын болон «Буряад зурагай» «Титэм-Арт» гэһэн студи үнгэрһэн амаралтын үдэрнүүдтэ Буряад Уласай Үндэһэтэнэй номой санда «Сагаан толгой» гэһэн монгол бэшэгэй хоёрдохи мүрысөө эмхидхээ. «Титэм-Арт» студиин байгуулагдаһаар хоёр жэлэй ойн баярай хэмжээндэ тус мүрысөөн үнгэрөө.

Буряад-монгол сэбэр бэшэлгын болон «Буряад зурагай» «Титэм-Арт» студи 2023 оной июль һарада байгуулагдаа. Энэ студи байгуулагшад каллиграф, монгол бэшэгэй багша Арюна Бато-Жаргаловна Булгутова болон каллиграф, заншалта буряад зурагай уран зураашан Туяна Тыхеева гэгшэд болоно.

- Монгол бэшэгтэ, монгол сэбэр бэшэлгэдэ, буряад зурагта дуратайшуулые һургадагбди. Үнгэрһэн хоёр жэлэй туршада монгол бэшэгэй грамматика болон сэбэр бэшэлгээр зуунһаа дээшэ хүн һуража гараа. Буряад соёлой һалбарида 120-һоо дээшэ мастер-классуудые үнгэргөөбди. Монгол, Хальмаг гүрэнүүдтэ үнгэргэгдэһэн каллиграфиин үзэсхэлэндэ, уласхоорондын, уласай хэмжээ ябуулга болон фестивальнуудта хабаадаабди: ВДНХ-гай үзэсхэлэн, Арт-Бурятия, Сагаалган, Соёл уралигай һүни, Музейдэ һүни, Библиоһүни, Ёохорой һүни, Алтаргана угтуулан гэхэ мэтэ болоно, - гэжэ «Титэм-Арт» студида хэлэбэ.

Байгша оной мүрысөөн гурбан номинацида үнгэрөө. Томошуул хоёр бүлэгтэ хабаадаа – нэгэ бүлэгтэнь мэргэжэлтэд, багшанар, хоёрдохи бүлэгтэнь – һуража байһан зон. Гурбадахи номинацида 12-тойһоо 17 хүрэтэр наһатай үхибүүд. Мэргэжэлтэдэй бүлэгтэ – найман хүн, томошуулай хоёрдохи бүлэгтэ - 36 хүн, үхибүүдэй бүлэгтэ зургаан хүн хабаадаһан байна.

- Үнгэрэгшэ жэлдэ эмхидхэгдэһэн мүрысөөнтэй зэргэсүүлхэдэ, байгша ондо даабаринуудынь хүндэ болгообди, юундэб гэхэдэ, хабаадагшадай эрдэм мэдэсэ үргэн болоо. Тиигэжэ томошуул хоёр бүлэгтэ хабаадаа. Үхибүүд грамматика һайнаар мэдэнэ, һайнаар уншана, уншаһанаа ойлгоно. Мүрысөөндэ хабаадаһан үхибүүдэй гурбаниинь «Титэм-Арт» студиин шабинар, хоёрынь – «Вагиндра» гэһэн каллиграфиин һургуулиин һурагшад, үшөө нэгэниинь өөрөө монгол бэшэгтэ һураһан юм, - гэжэ Арюна Булгутова тэмдэглэнэ.

Сэбэр бэшэгэй мүрысөөндэ нэгэдэхи болон хоёрдохи һууринуудые «Титэм-Арт» студиин һурагшад эзэлээ, гурбадахи, дүрбэдэхи һууринуудта «Вагиндра» һургуулиин шабинар хүртөө.

 Мэргэжэлтэдэй дунда нэгэдэхи һуури Екатерина Николаевна Таханова эзэлээ, хоёрдохи һуурида - Сэсэг Намжиловна Гомбоева, гурбадахи һуурида Очирма Ванчиновна Раднаева хүртөө.

Монгол бэшэгтэ һуража байһан хүнүүдэй дунда нэгэдэхи һуури - Лыгжима Маниевна Цыдыпова, хоёрдохи һуури - Эрдэни Бато-Очирович Жалцанов, гурбадахи һуури Светлана Чимитовна Добрынина эзэлээ.

Үхибүүдэй дунда Арюнтуя Жаргаловна Мункуева 1-дэхи һуури эзэлээ, Аюр Сергеевич Романов –хоёрдохи һуурида, Алдар Сергеевич Дылгыров гурбадахида һуурида хүртөө.

Мүрысөөнэй бүхы хабаадагшадта - үнэмшэлгэнүүд, илагшадтань дипломууд болон сэнтэй бэлэгүүд барюулагдаа.

Тиихэдэ «Сагаан толгой» гэһэн хоёрдохи мүрысөө эмхидхэһэн «Титэм-Арт» студи болон Буряад Уласай Үндэһэтэнэй номой санда Монголой Генерально консульствоһоо баярай бэшэг барюулагдаа.

Мүнөө Буряад Уласай Үндэһэтэнэй номой санда «Титэм-Арт» студиин «Буряад зурагай» уран зураашан Туяна Тыхеевагай шабинарай бүтээлнүүд олоной һонорто июниин 8 болотор дэлгэгдэнхэй.