Буряад Улас Яхадта үнгэргэгдэһэн креативна индустриин хуралдаанда хабаадаа

«Алас Дурнада бүтээгдэбэ: урлалһаа экономикодо» гэһэн уласхоорондын шэные үүсхэһэн үйлэдбэриин II хуралдаан Якутск хотодо байгша оной майн 29-һөө 31 болотор үнгэргэгдөө. Буряад Уласай делегациин бүридэлдэ ороһон 31 хүн хуралдаанай талмайнуудта хүтэлэгшэдэй ба тобшолол хэдэг мэргэжэлтэдэй үүргэ дүүргээ. Тэдэнэй дунда уласай Засагай газарай профильно һалбаринуудай, шэные үүсхэһэн түбэй,  кинематографай түлөөлэгшэд, гэрэл зураг буулгагшад, сценаристнууд, уран найруулагшад, графическа дизайнернууд, багшанар, олзын хэрэг эрхилэгшэд, зүжэгшэд гэхэ мэтэ. Буряад Уласай стенднүүд дээрэ «Домбо» компаниин шатааһан шабараар хэгдэһэн бүтээлнүүд, «ABZAEVA» брендын дизайнерска хубсаһан, һэеыгээр хэгдэһэн бүтээлнүүд, ювелирна гоёолтонууд, гарай бэлэгүүд болон бэшэшье хэмэл эдлэл табигдаа.

Хуралдаанда Монголой ба Хитадай түлөөлэгшэдэй хабаадалгада Буряад Улас дэмжэлгэ үзүүлээ. Уласай делегациин бүридэлдэ Гонконгын наймаанай ба технологическа «KAВ18 Technology limited» компаниин генеральна менеджер Чжу Шуань Шэнь, Монголой Юрэнхылэгшын дэргэдэхи киноиндустриин ба үйлэдбэриин Зүблэлэй гэшүүн Батмунх Пурэвдорж гэгшэд ороо. Гадаада гүрэнүүдэй түлөөлэгшэд панельнэ сессинүүдтэ үгэ хэлэхэ, Буряад Уласай шэные үүсхэһэн Түбтэй хэлсээнүүдые баталха юм.

Хуралдаанай хэмжээндэ «Ажалай Квартал» гэһэн шэные үүсхэһэн кластерта Оросой Холбоото Уласай Засагай газарай Түрүүлэгшын орлогшо, Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ  Юрий Трутнев, Оросой Холбоото Уласай Алас Дурна ба Арктика хүгжөөлгын сайд Алексей Чекунков хүрөө. Тэдэ «Шэные үүсхэһэн үйлэдбэринүүдэй хэһэн зүйлнүүд «Алас Дурнада бүтээгдэбэ» гэһэн үзэсхэлэн хараа. Үзэсхэлэндэ Алас Дурнын тойрогой 11 нютаг можын олзын хэрэг эрхилэгшэдэй ба уран гартанай бүтээлнүүд табигдаа.

- Хуралдаанда эдэбхитэй зон хабаадана. Тэдэ түсэлнүүдые, урлалай нэгэдэлнүүдые байгуулхые оролдоно. Иимэ хэмжээ ябуулганууд хүн зоной нэгэдэхэ хэрэгтэ нүлөөлнэ, тэдэ бэе дээрээ дэмжэлгэ мэдэрнэ, - гэжэ Оросой Холбоото Уласай Засагай газарай Түрүүлэгшын орлогшо, Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ  Юрий Трутнев тэмдэглэбэ.

Майн 30-да хуралдаанда видеоконференц-холбоогоор Буряад Уласай Толгойлогшо хабаадаа. Алексей Цыденов «Креативный капитал – синергия творчества и экономики» гэжэ нэрлэгдэһэн панельнэ сессидэ хабаадажа, мүнөө сагта нютаг можодо шэные үүсхэһэн үйлэдбэриин хүгжэлтэ тухай хөөрэбэ.

- Мүнөө хотодо, хүдөө һууринда, уласай ямаршье газарта хүн бүхэн дуратай хэрэгээ эрхилжэ, олзо олохо аргатай.  Креативна экономико ажамидаралай шанар дээшэлүүлхэ аргануудай нэгэн болоно. Дуратай юумэеэ хэжэ байһан хүн жаргалтай, тэрэ үшөө олзо олоно ха юм. Бидэ шэные үүсхэһэн үйлэдбэридэ дүршэлтэй болообди. Буряад Уласта кино буулгагдана, манай фильмнүүд гүрэнэй  кинотеатрнуудта харуулагдадаг. IT-шэглэл хүгжөөнэбди, Сбербанктай хамта тоо оньһото экономикын мэргэжэлтэдые бэлдэхэ һургуули байгуулнабди. Буряадай уран гартан эрдэниин зүйлэй хэрэг хүгжөөнэ, худалдаанай тэмдэгтэй, эрхим шанартай хубсаһа оёно, гарай бэлэгүүдые бүтээнэ. Эдэ бүгэдэ аяншалга хүгжөөлгэтэй нягта холбоотой. Бэлэн эдеэнэй һалбари мүн хүгжэнэ, - гэжэ Алексей Цыденов тэмдэглээ.

Хуралдаанай программада 250 хүтэлэгшын хабаадалгатай 150 гаран хэмжээ ябуулга оруулагдаа. Гол анхарал кинодо, анимацида, шэнэ маяг заншалда, хүгжэмдэ, бэлэн эдеэ хоолдо, тоо оньһоной зохёохы ажаябуулгада, видео-наадануудые байгуулгада хандуулагдана. Хуралдаанай үедэ мастер-классууд, түхэреэн шэрээнүүд, стратегическа удха шанартай сессинүүд, хүрэнгэ шэглүүлэгшэдые олохо зорилготойгоор киногой түсэлнүүдтэй танилсалганууд (питчинг) эмхидхэгдэхэ.

Шэные үүсхэһэн үйлэдбэриин хуралдаан Оросой Холбоото Уласай Юрэнхылэгшэ Владимир Путинай Алас Дурна хүгжөөхэ талаар  бодолгонуудые бэелүүлхын тула эмхидхэгдээ. Россиин Алас Дурна ба Арктика хүгжөөлгын яаман, Алас Дурна ба Арктика хүгжөөлгын Корпораци, Саха (Яхад) Уласай Засагай газар хуралдаа эмхидхээ.