Буряад Уласта һурагшадай «Эдир геройнуудай үе саг» гэһэн зунай халаан үнгэргэгдэхэ

«Сэрэгшэ» түбэй «Эдир геройнуудай үе саг» гэһэн нютаг можо хоорондын халаануудай хаһа Буряад Уласта байгша оной июниин 12-һоо эхилхэ. «Сэрэгшэ» түбэй эрхим инструкторнуудай хүтэлбэри доро эдиршүүл сэрэгэй бэлэдхэл гараха, хүтэлэгшэгүйгөөр ниидэдэг аппарадуудые хэрэглэжэ, түрүүшын туһаламжа үзүүлжэ һураха, тактическа эмнэлгэтэй танилсаха, Россиин аюулгүйе сахиха талаар эрдэм мэдэсэтэй болохо.

 - «Эдир геройнуудай үе саг»  гэһэн зунай халаануудай үедэ эдиршүүл амархын хажуугаар элдэб шэглэлнүүдээр бэлдэлгэ гараха, шэнэ эрдэм мэдэсэтэй болохо, бэеэ һорихо, командын бүридэлдэ хүдэлжэ, шиидхэбэринүүдые абажа һураха. Тамирай талаар туршалгануудай ашаар бэе бэеэ шагнажа, ойлгожо, харюусалга бэе дээрээ абажа мүн һураха. Үхибүүн бүхэнэй бэлиг шадабари элирүүлхэ оршон байгуулхабди. Хүсэ шадалтай хүн заабол герой болодоггүй, харин нүхэдөө хойноо дахуулжа, тэдэнээ эмхидхэжэ шададаг, нүхэдтөө этигэдэг хүн герой болодог гэжэ эдиршүүлэй мэдэрхэнь шухала. Энэ зун мартагдашагүй саг болон үлэхэ, - гэжэ Буряад Уласай «Сэрэгшэ» түбэй захирал Николай Собенников тэмдэглэбэ.

Энэ жэлдэ үхибүүдтэ анха түрүүшынхиеэ снайпингаар курс үнгэргэгдэхэ. «Сэрэгшэ» түб Россиин дайшалхы снайпингын Федерацитай хамта тус курс бэлдээ. Тиихэдэ парашютна бэлдэлгээр шухаг программа дурадхагдаха. Гадна «Зарница 2.0» наадан, Россиин Геройнуудтай, тамирай  ба урлалай ододтой уулзалганууд, Волгоград хотын түүхэтэ газарнуудаар экскурсинүүд эмхидхэгдэхэ. Курсант бүхэн тусхай хубсаһаар хангагдаха, харин халаанай түгэсхэлдэ «Сэрэгшэ» түбтэ бэлэдхэл гараһан тухай үнэмшэлгэ абаха.

 «Эдир геройнуудай үе саг» гэһэн хэмжээ ябуулга Буряад Уласһаа гадуур Кемеровын, Мурманскын, Псковой, Сахалинай, Свердловскын. Тюмениин можонуудта, Хальмагта, Татарстанда, Чечен Уласта, Чувашида, Яхадта, Хабаровскын ба Камчаткын хизаарнуудта, Ямало-Ненецкэ автономно тойрогто үнгэргэгдэхэ, 12874 эдиршүүл тэндэ хабаадаха. Үнгэрэгшэ жэлтэй сасуулбал, 2040 хүнөөр хабаадагшадай тоо ехэ болохо, харин 81 халаанай орондо 84 халаан эмхидхэгдэхэ.

Һануулхада, «Сэрэгшэ» гэжэ түб Россиин Юрэнхылэгшэ Владимир Путинай даабаряар байгуулагдаһан байна. Түбэй таһагууд манай гүрэнэй 21 нютаг можодо хүдэлнэ. Алас Дурнын тойрогто нютаг можын таһагууд Хабаровскын хизаарта, Буряад Уласта, Сахалинда, Камчаткада, Саха Уласта (Яхад) нээгдэнхэй. «Сэрэгшэ» түбэй таһагуудта 400 гаран инструктор хүдэлнэ, тэрэ тоодо Россиин дайшалхы снайпингын Федерациин мэргэжэлтэд . Тэдэнэй олониинь сэрэгэй тусхай үйлэ хэрэгүүдэй  хабаадагшад болоно. Тэдэ 14-һөө дээшэ наһатай залуушуултай хүдэлнэ. Хоёр жэлэй туршада элдэб шэглэлнүүдээр 55000 гаран курсант һуралсал гараа.