Буряад Уласта сэрэгэй тусхай үйлэ хэрэгүүдэй ветерануудта туһа хүргэгдэнэ

Нютаг можодо сэрэгэй тусхай операциин ветерануудта ба хабаадагшадта ажал олохо ба шэнэ мэргэжэлтэй болохо талаар туһа үзүүлэгдэнэ.

- Агентство ветерануудта ба тэдэнэй гэр бүлэнүүдэй гэшүүдтэ таарамжатай гурбан программа бэелүүлнэ: «Ажалда абталгын эдэбхитэй политика», һуралсалай түлөө түлэхэ болбосоролой үнэмшэлгэнүүд ба үндэһэтэнэй «Кадры» түсэл, - гэжэ Ажалаар хангалгын улас түрын агентствын хүтэлбэрилэгшын орлогшо Цырен Дармаев тэмдэглэбэ.

Жэлэй эхинһээ хойшо агентстводо сэрэгэй тусхай үйлэ хэрэгүүдэй 45 хабаадагша хандаһан байна. Тэдэнэй зургааниинь ажалтай болоо, харин юһэн хүн шэнэ мэргэжэлдэ һурана. Тэрэнэй хажуугаар, нютаг можын Толгойлогшо Алексей Цыденовэй үүсхэлээр «Буряадай патриодууд» гэһэн программа ябуулагдажа эхилээ. Тус программада сэрэгэй тусхай үйлэ хэрэгүүдэй 400 гаран ветеран хабаадаха хүсэлөө мэдүүлээ. Болбосоролой курсда 35 хүниие абаха юм.

 «Һуралсал гараһан зон гүрэнэй ба нютагай засагай органуудта, уласай дэбисхэр дээрэхи томо үйлэдбэринүүдтэ  ажалда абтаха», - гэжэ «Эсэгэ ороноо хамгаалагшад» жасын Буряад Уластахи таһагай хүтэлбэрилэгшэ Илья Михалев тэмдэглэбэ.
Гэхэтэй хамта Ажалаар хангалгын улас түрын агентство һуралсалай түрүүшын ээлжээндэ ороогүй ветерануудтай ажал үргэлжэлүүлхэ.

Сэрэгэй тусхай үйлэ хэрэгүүдэй ветеран Мунко Цымпилов программаар һураха эрмэлзэгшэдэй нэгэн болоно. Тэрэ уласай хүгжэлтэдэ хубитаяа оруулха хүсэлтэй, тиимэһээ программада хабаадаха захяа эльгээгээ. Байгша оной март һарада болбосоролой программада хабаадаха дуратай зониие бүридхэлдэ абажа эхилээ һэн. Мунко Цымпилов арга шадалаа туршаха гэжэ шиидээд, шэлэн абалгын бүхы шатануудые гараа. Мүнөө тэрэ дүнгүүдые хүлеэжэ байна.

Мунко Цымпилов 2018 ондо Эхэ ороноо хамгаалха зорилготойгоор хэлсээ баталжа, сэрэгшэдэй тоодо ороо һэн.  Сэрэгэй тусхай үйлэ хэрэгүүдтэ түрүүшын үдэрнүүдһээ хабаадаа. Мүнөөдэр тэрэ гүрэнэй «Эсэгэ ороноо хамгаалагшад» жасын Буряад Уластахи таһагта ниигэмэй тэнсүүлэгшээр ажаллана.