«Найрамдал» медаляар шагнагдаа

Бурхан багшын Ехэ дүйсэн үдэр (Монгол орондо улас түрын һайндэр гэжэ сонос­хогдонхой) Монгол ороной Улаан- Үдэдэхи Генеральна консульстводо манай хүндэтэ Галина Хандуевна Да­шеева-Базаржаповада Монгол Уласай «Найрамдал» медаль хүндэтэйгөөр барюулагдаа.

Хүндэтэ айлшадые, гүрэн түрын сайд түшэмэлнүүдые угта­даг ёһололой танхим соо Буряадай, Оросой соёлой габьяата хүдэлмэрилэгшэ, Буряадай арадай поэт, хэдэн шангуудай лауреат, ира­гуу найрагша, уран зохёолшо, оршуулагша, сэдхүүлшэн, сурбалжа­лагша, “Байгал” сэдхүүлэй эрхилэгшэ Галина Хандуевна Дашеева-Базар­жаповада үндэр шагнал барюулгын баяр ёһололдо хабаадахаяа Орос Уласай габьяата, Буряадай арадай артист, уран зохёолшо, оршуулагша, Буряадай Толгойлогшын дэргэдэ­хи Аха захатанай зүблэлэй гэшүүн, Монгол ороной “Алтан гадаһан” ор­деной кавалер Доржи Норбосам­пилович Сультимов, “Буряад үнэн” Хэблэлэй байшангай захирал-аха­мад эрхилэгшэ Даши-Доржо Найманович Болотов, мүн эдэ мүрнүүдэй автор ошообди.

Тэндэ Монгол ороной Улаан-Үдэдэхи Юрэнхы кон­сул Ц. Ганхуяг, консул Б. Бат­чулуун, вице-консул Ч. Батби­лиг, вице-консул Б. Батням, мэргэжэлтэн Б.Болдсүрэн гэгшэд хүндэтэйгөөр угтажа:

- Мүнөөдэр, Бурхан баг­шын Ехэ дүйсэн үдэр, ма­най Монгол орондо улас түрын һайндэр гэжэ сонос­хогдонхой. Тиимэһээ ма­най консульствын ажалшад бүгэдөөрөө амаржа байна. Харин бидэ Монгол орон­до маша хүндэтэй Галина Хандуевнае энэл Ехэ дүйсэн үдэртэ Монголой түрүү ме­даляар хүндэтэйгөөр шаг­нахаяа энэ һайн үдэрые һунгаһан байнабди. Мүн лэ Орос Уласай һайндэр боло­хонь ха юм, - гэжэ Юрэнхы консул Ц. Ганхуяг маанадые халуунаар угтаа.

Юундэ, ямар хэрэгүүдэй, ямар ехэ амжалтануудай, туйлалтануудай түлөө 1974 онһоо бүхы наһаараа “Бу­ряад үнэндэ” шударгыгаар ажаллажа, буряад арадайн­гаа хүгжэлтэдэ горитой ху­битаяа оруулжа ябаһан Га­лина Дашеева-Базаржапова хари гүрэнүүдэй эрхэтэдые шагнадаг Монгол ороной дээдын шагналда 2025 оной майн 5-ай (Совет хэблэлэй һайндэр) 65-дахи зарлигаар хүртэбэб гэжэ Б. Болдсүрэн Монгол ороной Юрэнхылэг­шэ Ухнаагийн Хүрэлсүхын бэшэгые ородоор уншажа үгөө. Манай Галина Ханду­евна Монгол ороной шэлдэг зохёолшодой уран зохёол­нуудые буряад уншагшадта уран наринаар хүргөө, Хал­хын Голой дайе, тэдэ байл­даануудай гайхамшагта баатаршалгануудые үнэншэмэ зүбөөр харуулаа, Эсэгэ оро­ноо хамгаалгын Агууехэ дайнда монгол туургата ара­дуудай аша габьяае тодор­хойлоо юм.

Монгол оронойнгоо үндэр шагналые манай Гали­на Хандуевнада барюулаад байхадаа, Ц. Ганхуяг:

- Би өөрөө Завхан айма­гай Уляастайн хүм, тиигээд лэ Уляастаймнай хүлэг бе­лорус сэрэгшэтэй аяар Бер­лин хүрөөд, Эльбэдэ туруу­гаа угаагаад, өөрөө Монгол орондоо бусажа ерээ гэжэ уншахадаа, сэдьхэлээ ехэтэ хүдэлгөөб, - гэжэ бүри өөрын онсо баяр хүргөө.