Буряад-монгол зурхай июниин 30-һаа июлиин 6

Июниин 30, гарагай 2, буряад-монгол литээр 5.

“Модон хохимойн” ба “Тэрсүүд” үдэрнүүдэй дабхарлаһан энэ үдэр ехэ тушаалай шэрээдэ гарахые, шэнэ ажалда орохые, айраг тараг бүрихые, бэри буулгахые, эд бараа, адуу мал хажуу тээшэнь үгэхые, хүүр залахые, сэрэг хүдэлгэхые, замда гарахые, нүүхые тэбшэхэ.

 “Түрэлнүүдэй” үүдэн нээгдэнэ: түрэл гаралнуудтаяа найрлахагүй.

Энэ үдэр харгыда гарахада муу, илангаяа баруун зүг руу.

Нохой жэлтэндэ һанаһанаа бүтээхэдэ урагшатай, хонин жэлтэнэй буянай гараг.

Үһэеэ абхуулхада – баялигта.

Июлиин 1, гарагай 3, буряад-монгол литээр 6.

6-да адуу мал номгодхоходо, һургахада, газар хахалхада, таряа ногоо тарихада һайн. Дэгэл хубсаһа эсхэхэдэ, адуу малай үһэ нооһо хайшалхада, эд бараа, адуу мал худалдажа абахада, худалдахада, хажуу тээшэнь үгэхэдэ, аралжаа наймаа ябуулхада муу.

Амгалан тайбанай, баялигай хэшэг даллага абахада; хулгана, луу, бишэн жэлтэй хүнүүдтэ хии мориёо хиидхэхэдэ, һайн үдэр.

“Хэрэмэй” үүдэн нээгдэнэ: гэрэй һуури татахагүй, гэр байра заһабарилхагүй, зөөлгэхэгүй.

Энэ үдэр харгыда гарахада, зүүн зүг руу муу, бэшэ тээшэ зүглэхэдэ һайн.

Морин, могой жэлтэнэй урагшатай үдэр; хулгана, гахай жэлтэнэй буян үйлэдэхэ гараг. Тахяа, бишэн жэлтэндэ муу үдэр, һэргэг ябаха хэрэгтэй.

Үһэеэ абхуулхада – зүһэ шарай муудаха.

Июлиин 2, гарагай 4, буряад-монгол литээр 7.

7-до газар уһанай ажалнуудта, шэнэ гэр байшан бодхооходо, газар хахалхада, таряа ногоо тарихада, наһа барагшын үйлэнүүдтэ һайн. Эд бараа, адуу мал худалдан абахые, үһэ нооһыень хайшалхые, дэгэл хубсаһа эсхэхые, бэриин хэрэгүүдые тэбшэхэ.

Амгалан тайбанай, мориной хэшэг даллага абахада; бар, морин, нохой жэлтэй хүнүүдтэ хии мориёо хиидхэхэдэ һайн.

“Бэриин” үүдэн нээгдэнэ: хурим түрэ наадахагүй.

Энэ үдэр харгыда гарахада, зүүн зүг руу муу, бэшэ тээшэ зүглэхэдэ хамаагүй.

Хулгана, гахай жэлтэнэй һайн гараг; үхэр, луу, нохой жэлтэнэй буян үйлэдэхэ үдэр. Морин, могой жэлтэн һэргэг байхые оролдог.

Үһэеэ абхуулхада – хэлэ аман дэлгэрхэ, заргалдаха.

Июлиин 3, гарагай 5, буряад-монгол литээр 8.

Отошо бурханай дүйсэн үдэр

8-да адуу мал хүнгэлхэдэ, гаргахада, агнахада, ада шүдхэр дарахада һайн. Эд бараа, адуу мал худалдан абахада, дэгэл хубсаһа эсхэхэдэ, замда гарахада, адуу малай үһэ нооһыень хайшалхада, газар таряалангай ажалда, бэриин хэрэгүүдтэ муу нүлөөтэй.

Амгалан тайбанай, хүүгэдэй хэшэг даллага абахада; тахяа, үхэр, могой жэлтэй хүнүүдтэ хии мориёо хиидхэхэдэ һайн.

“Үхээриин” үүдэн нээгдэнэ: хүүр залахагүй.

Энэ үдэр "морин үхэхэ, эмээл хухарха” ушарһаа харгыда гарахада муу, илангаяа зүүн зүг руу.

Бар, туулай жэлтэнэй урагшатай үдэр, харин тахяа, бишэн жэлтэнэй буян үйлэдэхэдэ һайн. Үхэр, луу, хонин, нохой жэлтэн һэргэг ябахые оролдохо.

Үһэеэ абхуулхада – наһан ута болохо.

Июлиин 4, гарагай 6, буряад-монгол литээр 9.

9-дэ замда гарахада, адуу мал һургахада, хубсаһа хунар эсхэхэдэ, аралжаа наймаа ябуулхада һайн. Адуу малай нооһыень хайшалхые, эд бараа, адуу мал худалдан абахые, бэриин, наһа барагшын хэрэг бүтээхые тэбшэхэ.

Амгалан тайбанай, хониной хэшэг даллага абахада һайн.

“Үхэлэй” үүдэн нээгдэнэ: хүүр залахагүй.

Энэ үдэр харгыда гарахада, урда зүг руу муу, бэшэ тээшэ һайн.

Хонин, тахяа, бишэн жэлтэнэй урагшатай, һайн үдэр; морин, бишэн жэлтэнэй буянай үдэр. Бар, туулай жэлтэнэй чисаа гараг – һэргэг ябаха хэрэгтэй.

Үһэеэ абхуулхада – үбшэндэ.

Июлиин 5, гарагай 7, буряад-монгол литээр 10.

Бадмасамбаавын дүйсэн үдэр.

10-да дэгэл хубсаһа эсхэхэдэ, газар хахалхада, таряа ногоо тарихада, адуу малай нооһыень хайшалхада һайн. Бэриин хэрэгүүдые, замда гарахые, эд бараа, адуу мал худалдан абахые тэбшэхэ.

Амгалан тайбанай, таряанай хэшэг даллага абахада һайн. Бар, морин, нохой жэлтэй хүнүүдтэ хии мориёо хиидхэхэдэ, һайн үдэр.

“Ниитын” үүдэн нээгдэнэ: суглаа зарлахагүй, шухала уулзалга эмхидхэхэгүй.

Энэ үдэр харгыда гарахада муу, илангаяа баруун зүг руу.

Үхэр жэлтэнэй урагшатай гараг; бар, туулай жэлтэнэй буян үйлэдэхэ үдэр. Хулгана, гахай жэлтэндэ урагшагүй үдэр, һэргэг байха хэрэгтэй.         

Үһэеэ абхуулхада – жаргалда.

Июлиин 6, гарагай 1, буряад-монгол литээр 11.

Далай ламын түрэһэн үдэр.

11-дэ гүү барихада, адуу мал номгоруулхада, һургахада, гаргахада, хүнгэлхэдэ, гэр байшан бодхооходо, газар таряалангын, бэриин үйлэнүүдтэ һайн. Дэгэл хубсаһа эсхэхые, адуу малай үһэ нооһые хайшалхые, эд бараа, адуу мал худалдан абахые тэбшэхэ.

Энэ үдэр амгалан тайбанай, эдеэ унданай, баялигай, адуу малай хэшэг даллага абахада һайн.

“Айлшанай” үүдэн нээгдэнэ: түрэл гаралнуудтаяа найрлахагүй.

Энэ үдэр харгыда гарахада, баруун зүг руу муу, бэшэ тээшэ зүглэхэдэ һайн.

Луу жэлтэнэй урагшатай, һайн гараг.

Үһэеэ абхуулхада – ухаан мэдэрэл хурсадаха.

Жаргал лама Дугданов бэлдэбэ