​Ерэ наһанай ехэ ой

Июлиин 6-да Үндэр түрэлтэ Далай ламын түрэһэн үдэр, 90 наһанайнь ехэ ойн баяр дэлхэйн буддын шажантан тэмдэглэнэ. Энэ ушараар Далай багшын 1991 оной нажар Буряад орондо заларха үедэ Буряадай арадай ирагуу найрагша Цырендулма Цыреновна Дондогойн бэшэһэн «Далай ламын магтаал» толилхомнай. Эдэ үгэнүүд дээрэнь мэдээжэ композитор Юрий Ирдынеев хүгжэм бэшэһэн юм.

Далай ламын магтаал

Оройн шэмэг Зонховын

Одон доро мүндэлһэн

Далай лама багшамнай

Дахин эрьен морилбо.

Боди сагаан сэдьхэлэй

Бодол мандаа түхөөжэ,

Зургаан алтан үзэгэй

Зүрхэн тарняар адислаа –

Арьяа Баала ум маа ни бад мэ хум!

Бурхан багшын сурталаар

Бодисада болонхой,

Далай ехэ эрдэмтэй

Далай ламада мүргэмэй!

Боди сагаан сэдьхэлэй

Бодол мандаа түхөөжэ,

Зургаан алтан үзэгэй

Зүрхэн тарняар адислаа –

Арьяа Баала ум маа ни бад мэ хум!

Үлгэн түби дэлхэйдээ

Үлзы хутаг үршөөжэ,

Мэлмы нюдэн арюусхан,

Мүнхын һургаал хүртөөжэ,

Боди сагаан сэдьхэлэй

Бодол манда түхөөжэ,

Зургаан алтан үзэгэй

Зүрхэн тарняар адислаа –

Арьяа Баала ум маа ни бад мэ хум!

Оройн шэмэг ухаанай

Орьёл гэгээн алдартай,

Далан мянган тарнитай

Далай ламадаа мүргэмэй!

Боди сагаан сэдьхэлэй

Бодол манда түхөөжэ,

Зургаан алтан үзэгэй

Зүрхэн тарняар адислаа –

Арьяа Баала ум маа ни бад мэ хум!

1991 он.

Цырендулма ДОНДОГОЙ