Буряад Уласай гэр бүлэ 11-дэхи үхибүүтэй болоо

Июниин 30-ай дабаа гарагта Буряад Ула­сай Толгойлогшо Алексей Цыденов Ула­сай перинатальна түб зорюута хүрэжэ, 11-дэхи үхибүүгээ түрэһэн буряад эжые халуунаар амаршалаа. Ирина Юриковна Оюна хүүхэнтэеэ перинатальна түбһөө гаража, гэртээ харихаяа түхеэржэ байгаа.

Хяагтын аймагай Бадма Жаргалович, Ири­на Юриковна Ринчиновтэнэй одхон ба­саган (магад, үшөө дүүе дахуулха бай­гаа, ойлгомторгүй одхон гэжэрхибэбди) Оюна июниин 26-да алтан дэлхэйдэ мүндэлөө. Үнэр баян энэ бүлэдэ мүнөө 7 хүбүүн болон 4 ба­саган болобо, ууган сагаан аха хүбүүн – 18-тай. Эндэһээ хараад үзэхэдэ, үхибүүд үшөөл баганууд, Бадма Жаргалович Ирина Юриковна хоё­рой урда ехэл ажал хүлеэнэл даа гэжэ ойлгосо­той. Теэд яашаха һэм даа, Зүблэлтын үедэ арбаһаа үлүү үхибүүдтэй гэр бүлэнүүд нилээд олон байг­ша бэлэй. Тиихэдэ олон үхибүүдтээ дарагдажа, тулижа, зобожо байнаб, улаан сурбануудаа яажа үндылгэхэ юмбиб гэхэ эхэ эсэгэнэр үгы һэн. Аха дүүнэр олон лэ байхадаа, бэе бэедээ туһатай, бэе бэеэ үргөөд ябаха гэжэ һайханаар һанадаг, гүрэн түрэһөөшье дэмжэгдэдэг һэн. Эсэгын ехэ дай­най үшөө дүүрээдүй байхада – 1944 ондо олон үхибүүдтэй эжынэрые орден медальнуудаар шаг­наха, арбан үхибүүтэй эжыдэ алтан медаль ба- рюулжа, “Эхэ-Герой” гэһэн алдар соло олго­дог болоо һэн. Үхибүүн бүхэн багаханшье һаа, өөрын түлбэри мүнгэтэй байгаа. Тиихэдэ үхибүү түрэһэнэйхиие гэжэ үшөө мүнгэ гүрэнһөө абажа байхаш гэжэ ехэтэ баярладаг бэлэй.

Монгол туургата арадуудай түүхэ иран хараха­да, эжы хүн хэзээдэшье хүндэ ямба дээрэ ябаһан байдаг. Агуу Богдо Чингис хаан гурбан хүбүүтэй эжые үргэмжэлжэ, эрэшүүлтэй адли хойморто заларжа, адли хөөрэлдэжэ, хүндэ ямбада хүртэхэ болгоһон. Харин долоон хүбүүтэй эжы бүри дээгүүр, ямаршье эрэлхэг сэрэгшэһээ дээгүүр хүндэ ямбатай байгаа. Юһэн хүбүүтэй эжы ямар­шье ноёд сайдһаа үлүү, үндэр изагууртай хаантай зэргэ байха эрхэтэй һэн.

Хяагтын аймагта ажаһуудаг Ринчиновтэнэй үнэр бүлэ хүдөө ажахытай. Тэдэ манай уласай нии­гэмэй дэмжэлгээр уласайнгаа ниислэл хотодо гэр абаа һэн.

- Үнгэрһэн жэл энэ үнэр баян бүлэ ниигэмэй туһаламжаар Улаан-Үдын Шэнэ Комушкада һайн гэр абаа юм. Энэ болбол олон үхибүүдтэй гэр бүлэдэ манай туһаламжа болоно. Буряад орон­домнай гэр байраяа һайжаруулха, һайн гэр аба­ха хэрэгтэ дахин үгтэхэ түлбэридэ зургаан болон үшөөшье олон үхибүүдтэй гэр бүлэнүүд хүртэхэ аргатай. Мүнөө Ринчиновтэн түрэл нютагтаа өөрын үмсын ажахытай. Тиимэһээ Ирина ажа­хыгаа үргэдхэхэеэ үшөө газартай болохо хэрэг­тэмнай туһалыт даа гэжэ хандана. Туһалхабди. Үхибүүдынь лэ элүүр энхээр, зол жаргалтайгаар өөдөө болог. Үнэр баян бүлэдэ – аза жаргал! - гэжэ Буряад ороной Толгойлогшо Алексей Цыденов халуунаар амаршалаа.

Үнэр баян бүлые бидэшье һайн һайханаар амаршалаад, аза жаргалтай Бадма Жаргалович Ирина Юриковна хоёрто үри хүүгэдээ эршэтэй- гээр эрын хэмдэ хүргэжэ, бултанайнь гарые ганзагада, хүлыень дүрөөдэ хүргэжэ, ажабай­далай үргэн харгыда хүргэхыень хүсэнэбди: хүбүүдтнай хүсэтэй, басагадтнай урихан байг!