Буряад Уласта ректорнүүдэй нэгэдэхи хуралдаан үнгэрөө

Үзэсхэлэндэ ерэһэн айлшадта, һургуули түгэсхэгшэдтэ, тэдэнэй түрэлхидтэ ехэ һургуулида орохо зорилготой асуудалнуудаар һуралсалай хэлсээ баталха гурим, дүримүүд болон бусад олон асуудалнуудаар зүбшэл үгэдэг һуралсалай комиссиин түлөөлэгшэд хүдэлөө.

Форумдо хабаадагшадые болон айлшадые Буряад Уласай Толгойлогшын болон Засагай газарай Захиргаа­най хүтэлбэрилэгшын мэдээсэлэй бодолгын, олониитэтэй харилсаанай болон олониитын түсэлнүүдэй та­лаар орлогшо Ирина До­ржиева хүндэтэйгөөр угта­жа:

- Таанадые угтан абаһандаа, Орос болон Мон­гол гүрэнүүдэй хоорондохи хани барисаанай элшэн сайд болоһондоо, Буряад оромнай баяртай байна. Мүнөө жэл ректорнүүдэй түрүүшын хуралдаае бидэ үнгэргэжэ байнабди. Бу­ряад оромнай бүхы Орос гүрэндэ Ази түби руу орохо үүдэн-бартаа болоно гэжэ тэмдэглэхэ шухала. Буряад Улас 2023, 2024 онуудта анха түрүүшынхиеэ Будаадын шажанай уласхоорондын ху­ралдаануудые эмхидхэһэн байна. Энэ үүсхэл манай уласай хүтэлбэрилэгшын мэдэлэй байгаа, энэ хэмжээ ябуулга 15 гаран гүрэниие эблэрүүлэн суглуулаа. Тии- гэжэ Оросой Холбоото Улас Будаадын шажан­тай гүрэмди гэжэ дэлхэй дээрэ өөһэдыгөө дахин мэдүүлбэ. Ректорнүүдэй нэ- гэдэхи хуралдаан мүн лэ ехэ нүхэсэлэй, бата бэхи ха­рилсаанай, болбосоролой болон эрдэмэй һалбарида хамтын ажал хүгжөөлгын эхин болохо гэжэ этигэнэб, - гэжэ тэмдэглээ.

ВСГИК-эй ректор, Бу­ряад Уласай Ректорнүүдэй зүблэлэй түрүүлэгшэ Елена Перова энэ ехэ хуралдаанда дүй дүршэлөөрөө, һанал бо­долоороо, үүсхэлнүүдээрээ аша үрэтэйгөөр андалдажа, Орос-Монголой болбосо­ролой болон эрдэм ухаанай хүгжэлтэдэ зохид оршон байгуулха гэһэн этигэл найдабарияа мэдүүлхэдээ:

- Буряад Улас эрдэмтэ­дэйнгээ амжалтануудаар ехэтэ омогорходог. Буряадай дээдэ һургуулинууд ажа- ябуулгын бүхы һалбаринуудта кадрнуудые бэлдэлгын тон тэнсүүритэй, эбтэй эетэй системэ болоно. Тии- хэдэ ехэ һургуули бүхэн Монголой һуралсалай эмхинүүдтэй харилсаха талаар өөрын түүхэтэй гэжэ мэдээ­жэ. Ерээдүй байдалаа хам­та зохёое гэжэ бүгэдэниие уряалнабди, - гэжэ Елена Перова тэмдэглээ.

Энэ үзэсхэлэндэ уласаймнай ехэ һургуулинууд ганса болбосоролой түлэбүүдые бэшэ, харин эрдэмэй болон шэнжэлгын таһагуудай бүтээлнүүдые, ин­новационно хүгжэлтэнүүдые, болбосоролой болон эрдэм ухаанай һалбарида мүнөө үеын шиидхэбэринүүдые хүсэд дүүрэнээр харуулаа.

Монголой түрүүшын космонавт, Монголой Герой, СССР-эй Герой, генерал- майор Жүгдэрдэмидийн Гуррагчагай хэлэһээр, жэл бүри Монголой ехэ һургуулинуудые 600 гаран дүүргэгшэд Сибириин болон Алас Дурнын ехэ һургуулинуудта эрдэмээ дээшэлүүлхэеэ ерэнэ.

- Эндэ аргагүй олон мон­гол залуушуулнай һурана. Монголдоо бусажа ерэһэн һургуули дүүргэгшэд орон нютагайнгаа хүгжэлтэдэ тон ехэ хубитаяа оруулдаг. Тэдэнь Орос-Монголой ха­рилсаанай ажаябуулга он­солон харуулна. Залуушуу­лайнгаа хүмүүжүүлгэдэ ехэ анхарал хандуулдагбди, тэдэнэр Монголой зохистой эрхэтэд болохын тула хэ­рэгтэй мэргэжэлтэй боло­хо ёһотой. Мүнөөдэрэй энэ шухала хэмжээ ябуулгада дээдэ һургуулинуудаймнай хүтэлбэрилэгшэд манай болбосоролой хүгжэлтэдэ горитойхон хубитаяа оруулха гэжэ этигэнэб, - гэжэ Жүгдэрдэмидийн Гуррагча хуралдаанда хабаадагшадта хандаа.